2025 წლის ევროვიზია დასრულდა, მაგრამ კონკურსის ირგვლივ ცხარე დისკუსია არ წყდება. წლევანდელ ევროფესტივალზე ისრაელის განსაკუთრებულმა წარმატებამ არაერთი აღაშფოთა, მათ შორის, კონკურსის გამარჯვებული და ესპანეთის პრემიერმინისტრი.

ისრაელის წარმომადგენელმა იუვალ რაფაელმა, რომელიც ჰამასის 7 ოქტომბრის ტერაქტს გადარჩენილი მომღერალია, თავის ქვეყანას ევროვიზიაზე მეორე ადგილი მოუტანა. რაფაელი ტელემაყურებლის რჩეული გახდა — მან მაყურებლისგან უმაღლესი, 297 ქულა დაიმსახურა. ასეთმა შედეგმა ზოგიერთი გააკვირვა: ევროვიზიის მონაწილე რამდენიმე ქვეყნის მაუწყებელმა ხმის მიცემის პროცესის შემოწმებაც მოითხოვა; მათ შორის არიან ესპანეთი, ისლანდია, ბელგია, ფინეთი და ირლანდია.

ხმის მიცემის პროცესში მეტ გამჭვირვალობას ითხოვს ევროვიზიის წლევანდელი გამარჯვებულიც, ავსტრიელი JJ, რომელმაც არცერთი ქვეყნის ტელემაყურებლისგან არ მიიღო უმაღლესი 12 ქულა. მეტიც, მაყურებლის ქულებით ავსტრიამ მხოლოდ მე-4 ადგილი დაიკავა, ნახევარფინალში კი მე-5 პოზიციას დასჯერდა. ჟიურის რჩეული JJ ახლა ისრაელის მონაწილეობის წინააღმდეგაც გამოდის. მუსიკოსის თქმით, ისურვებდა, ევროვიზია მომავალ წელს ვენაში ჩატარდეს და კონკურსში ისრაელი აღარ მონაწილეობდეს.

"იმედგაცრუებული ვარ, რომ კონკურსიდან რუსეთი მოხსნეს, ისრაელი კი დატოვეს", — ამბობს JJ, — "ომში ორივე მათგანი აგრესორია და აქტიურად ცდილობენ გამოწვევას".

ევროვიზიის ფანების ნაწილი ისრაელის კონკურსიდან მოხსნას უკვე მეორე წელია, ითხოვს. ქვეყნის დისკვალიფიკაციის მომხრეა შარშანდელი გამარჯვებული, შვეიცარიელი ნემოც. რამდენიმე კვირის წინ, ევროვიზიის ყოფილი მონაწილეების ნაწილი მოთხოვნას ღია წერილითაც შეუერთდა.

11 მაისი, ევროვიზია 2025-ის გახსნის ცერემონია შვეიცარიის ქალაქ ბაზელში: შეკრებილები პალესტინის დროშებით და საპროტესტო ბანერებით ხვდებიან ისრაელის წარმომადგენელს. პალესტინური ქუფიით შემოსილმა ერთ-ერთმა პროტესტანტმა მუსიკოსს ყელის გამოჭრის გამომხატველი ჟესტიც უჩვენა, რის გამოც ისრაელის დელეგაციამ ადგილობრივ პოლიციას მიმართა.

ფოტო: Fabrice Coffrini / AFP

ევროვიზიაზე ისრაელის მონაწილეობის საკითხი პოლიტიკოსების ნაწილსაც აღელვებს. ესპანეთის პრემიერმინისტრმა კონკურსზე ქვეყნის მოხსნა ღიად მოითხოვა. პედრო სანჩესმა აღნიშნა, რომ "ორმაგი სტანდარტების არსებობა არ უნდა დავუშვათ", რადგან რუსეთს უკრაინაში შეჭრის შემდეგ ევროფესტივალზე მონაწილეობა შეეზღუდა. სანჩესი და მისი მთავრობა ისრაელს "გენოციდში" ადანაშაულებენ. ესპანეთმა შარშან პალესტინა დამოუკიდებელ ქვეყნადაც აღიარა.

ევროვიზიის ფინალის დაწყებამდე, კონკურსის ორგანიზატორების გაფრთხილების მიუხედავად, პალესტინის მხარდასაჭერი გზავნილი გაავრცელა ესპანეთის საზოგადოებრივმა მაუწყებელმაც. თუმცა, ისრაელი ესპანელი ტელემაყურებლის რჩეულიც გახდა და ქვეყნისგან უმაღლესი 12 ქულა მიიღო. დიასპორის საკითხებში ისრაელის მინისტრმა, ამიხაი შიკლიმ, სანჩესს სოციალურ ქსელში დასცინა; ესპანეთის მიერ ისრაელისთვის დაწერილმა ქულამ ქვეყნის პრემიერს ისეთი სილა გააწნა, ხმა იერუსალიმში გავიგეთო, თქვა შიკლიმ.

ევროვიზიის ორგანიზატორი, ევროპის მაუწყებელთა კავშირი (EBU), კონკურსიდან ისრაელის მოხსნის მოთხოვნებს აქამდეც არაერთხელ გამოხმაურებია. EBU-ის მტკიცებით, ევროვიზია უნივერსალურ, აპოლიტიკურ და ინკლუზიურ შოუდ უნდა დარჩეს, რომელიც მუსიკით მრავალფეროვნებას ზეიმობს. ევროვიზიის ხელმძღვანელი მარტინ გრინი ასევე განმარტავს, რომ კავშირი მაუწყებლების გაერთიანებაა და არა — ქვეყნების მთავრობების.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...