კოალიცია მოძრაობა ცვლილებებისთვის შეზღუდული შესაძლებლობების მქონე ადამიანების უფლებების შესახებ საკანონმდებლო ცვლილებების განხილვის გადადებას ითხოვს. მოთხოვნას საქართველოში მოქმედი არასამთავრობო ორგანიზაციები უერთდებიან.

ისინი ამბობენ, რომ შშმ პირები კორონავირუსის რისკჯგუფში არიან და ხალხმრავალ ადგილებს უნდა მოერიდონ, შესაბამისად, განხილვაში მონაწილეობას ვერ მიიღებენ.

"ვინაიდან ქვეყანაში არსებული ეპიდსიტუაციის გამო სპეციალური რეჟიმები და მათ შორის დისტანციური მუშაობა მოქმედებს, სრულიად გაუგებარია რატომ დაიწყო ფორსირებულ რეჟიმში ამ ცვლილებებზე მსჯელობა. როდესაც საქმე ეხება შშმ პირთა უფლებების შესახებ კანონს, აუცილებელია განხილვებში შშმ თემის წარმომადგებლები, მშობლები და არასამთავრობო ორგანიზაციები იყვნენ ჩართული", - აღნიშნავენ NGO-ები.

ისინი დღეს, 16 მარტს მნიშვნელოვანი საკანონმდებლო ცვლილებების განხილვას დაავადებათა კონტროლის ეროვნული ცენტრის რეკომენდაციების დარღვევად აფასებენ და აღნიშნავენ, რომ გაუგებარია, რა მიზანს ემსახურება ეს.

არასამთავრობო ორგანიზაციები მიუთითებენ, რომ სწორედ კორონავურუსის გამო და შესაძლო პრევენციისთვის, პარლამენტში განხილვამდე ჩანიშნული შეხვედრა ორჯერ გადაიდო.

NGO-ები მიმართავენ საქართველოს პრემიერ-მინისტრს, იუსტიციის მინისტრსა და პარლამენტის თავმჯდომარეს, "ქვეყანაში არსებული სახიფათო მდგომარეობის გათვალისწინებით, როდესაც საზოგადოება მნიშვნელოვანი გამოწვევის წინაშე დგას", გადაიდოს კანონპროექტის განხილვა.

"საკითხზე მუშაობას დავუბრუნდეთ მხოლოდ მას შემდეგ, რაც ჯანდაცვის მსოფლიო ორგანიზაცია და საქართველოს დაავადებათა კონტროლის ეროვნული ცენტრი გასცემენ რეკომენდაციას, რომ საგანგაშო პერიოდი ჩავლილია. ნუ გვაყენებთ გამოუვალ მდგომარეობაში და ნუ შევუქმნით პირდაპირ საფრთხეს ერთ-ერთ ყველაზე მოწყვლად და რისკ-ჯგუფში შემავალ ჩვენს მოქალაქეებს.

შშმ თემის მონაწილეობის გარეშე საკანონმდებლო ცვლილებების განხილვის გადადებას კოალიციასთან "მოძრაობა ცვლილებებისთვის" ერთად შემდეგი არასამთავრობო ორგანიზაციები ითხოვენ:

  • კოალიცია "მოძრაობა ცვლილებებისთვის";
  • საქართველოს ახალგაზრდა იურისტთა ასოციაცია (საია);
  • ადამიანის უფლებების სწავლებისა და მონიტორინგის ცენტრი (EMC);
  • პლატფორმა "ახალი შესაძლებლობებისთვის";
  • პარტნიორობა სოციალური კეთილდღეობისთვის;
  • პარტნიორობა ადამიანის უფლებებისთვის (PHR)
  • ოჯახები დისკრიმინაციის წინააღმდეგ;
  • ფონდი "აურეს" (Autes Foundation).

პარლამენტის ადამიანის უფლებათა დაცვის კომიტეტი შეზღუდული შესაძლებლობის მქონე პირთა უფლებების შესახებ, ასევე, თანმდევ საკანონმდებლო პაკეტს დღეს, 16 მარტს, 14:00 საათზე განიხილავს.