საპარლამენტო უმრავლესობის წევრის, გია გაჩეჩილაძის თქმით, ბიძინა ივანიშვილს ყოფილი თანაგუნდელები "აბულინგებენ". ამის შესახებ მან უმრავლესობის ყოფილი წევრის, ლევან კობერიძის საპასუხოდ განაცხადა. კობერიძემ თქვა, რომ პოლიტიკურ მოლაპარაკებებს "ფასი არ აქვს", თუ იქ უშუალოდ ბიძინა ივანიშვილი არ დაჯდება.

როგორც გაჩეჩილაძემ თქვა, მოლაპარაკებების მაგიდასთან ქართულ ოცნებას "პარტიის ელიტა" წარმოადგენს და შედეგს იმიტომ ვერ იღებენ, რომ ოპოზიცია "ფეხს ითრევს".

"ძალიან სამწუხაროა, რომ ის ადამიანები, რომლებიც ბიძინა ივანიშვილის წყალობით მოხვდნენ პარლამენტში, სრული ამ სიტყვის მნიშვნელობით, ახლა ბიძინა ივანიშვილის ბულინგით არიან დაკავებული. რა თქმა უნდა ბულინგია, რადგან ძალიან კარგად იციან, რომ ბიძინა ივანიშვილი არ ჩაერთვება ამ პროცესში. იქ ჩართულია პარლამენტის თავმჯდომარე, რომელიც აგრეთვე არის ოცნების პოლიტსაბჭოს წევრი, იქ არის გენერალური მდივანი, აღმასრულებელი მდივანი და ა.შ. ანუ პარტიის ელიტა არის ჩართული. ისინი ახმოვანებენ იქ უშუალოდ ქართული ოცნების პოლიტსაბჭოს გადაწყვეტილებებს", — განაცხადა გაჩეჩილაძემ პალიტრანიუსის ეთერში.