ნაციონალური მოძრაობის თავმჯდომარე, გრიგოლ ვაშაძე ამბობს, რომ მიხეილ სააკაშვილთან კონფლიქტი ვერ წარმოუდგენია. ვაშაძემ უარყო მედიაში გავრცელებული ინფორმაცია, რომ ის პარტიას ტოვებს.

"წავედი მარტო დალაი ლამას და რომის პაპის თანამდებობებიდან და ნაციონალურ მოძრაობაში ვრჩები. ყველა სისულელეს რატომ უსმენთ? რამდენი მოცლილი რაღაცას დაწერს ფეისბუქში აი ამ სისულელეს. როგორ წარმოგიდგენიათ ახლა ჯერ ჩემი და მიშას კონფლიქტი და მეორე ის, რომ მე გადავდექი ისე, რომ ეს იცის ვიღაცამ და მე არ მივმართე...", — თქვა გრიგოლ ვაშაძემ TV პირველთან საუბრისას.

გრიგოლ ვაშაძემ, ასევე აღნიშნა, მიხეილ სააკაშვილის მიერ დაანონსებული შტაბი, კიდევ ერთი პლატფორმა იქნება საქართველოში ხელისუფლების შესაცვლელად.

გაერთიანებული ოპოზიცია, დღეს, 10 თებერვალს საარჩევნო სისტემასთან დაკავშირებით მოლაპარაკებებს მართავს. ისინი ხელისუფლებისთვის ახალ შეთავაზებას განიხილავენ.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.