ოპოზიცია მოლაპარაკების მეხუთე რაუნდისთვის ხელისუფლებისთვის ახალ შეთავაზებებს განიხილავს. მთავარ არხთან საუბრისას ოპოზიციის ლიდერებმა აღნიშნეს, რომ მათთვის მთავარია ისეთ მოდელზე შეთანხმდნენ, რომელიც მაქსიმალურად ახლოს იქნება პორპორციულ საარჩევნო სისტემასთან.

ოპოზიცია დღევანდელ, 10 თებერვალს შეხვედრაზე რამდენიმე ვერსიას განიხილავს, მათ შორისაა 135/15-ზე შეთავაზება.

"130/20-ზე თუ 135/15-ზე თუ მსგავსი კონფიგურაციები არის აქტიური განხილვის ფაზაში ოპოზიციაში. ჩვენ გვაქვს ასევე გეგმა იმ შემთხვევისთვისაც თუკი ხელისუფლება არსებულ სისტემას დატოვებს, ეს არის ოპოზიციური კოორდინაცია მაჟორიტარების ირგვლივ და ამ შემთხვევაში ხელისუფლების დამარცხება აბსოლუტურად რეალისტურია", — თქვა ოთო კახიძემ მთავარ არხთან საუბრისას.

გუშინ, 9 თებერვალს, პარლამენტის ყოფილმა თავმჯდომარემ, ირაკლი კობახიძემ თქვა, რომ 100/50-ში მაჟორიტარი დეპუტატები საკუთარ თავს დაინახავენ, 125/25-ში კი ვერ. მისი აზრით, მაჟორიტარების რიცხვის კიდევ უფრო შემცირება კანონპროექტის ჩავარდნას გამოიწვევს.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.