მმართველი გუნდის დეპუტატი კარლო კოპალიანი, რომელიც ტექნიკური უნივერსიტეტის კანცლერი გახდა ამტკიცებს, რომ ყოფილი მთავარი პროკურორი ირაკლი შოთაძე გენერალური პროკურორობის კანდიდატად მას არ წარუდგენია. ის განმარტავს, რომ ეს უნივერსიტეტის საბჭოს გადაწყვეტილებაა, თუმცა არ მალავს, რომ შოთაძის კანდიდატურას მხარს უჭერს.

"მე ვთვლი, რომ სწორი გადაწყეტილება მიიღო ტექნიკურმა უნივერსიტეტმა, ვინც წარადგინა ეს კაცი და სწორ გადაწყვეტილებას მიიღებს უმრავლესობა, თუ ამ კაცს დაამტკიცებს გენერალური პროკურორის თანამდებობაზე. იმიტომ, რომ მე მაქვს ძალიან ბევრი არგუმენტი ამ თემაზე", — განაცხადა მან მედიაცენტრ მთავარში გამართულ ბრიფინგზე.

მისი თქმით, შოთაძის წარდგენამ "იმ ადამიანების და პოლიტიკოსების გაღიზიანება გამოიწვია, ვინც ლოგიკურად ვერ იტანს" მას. მანვე აღნიშნა, რომ სურს საზოგადოებას "სხვა კუთხით შეახედოს" ამ საკითხზე, ამიტომ დაასახელა "რამდენიმე არგუმენტი", რომლის გამოც შოთაძე კარგი კანდიდატია პროკურორობისთვის:

  1. შოთაძემ შექმნა პროკურატურაში ის მოცემულობა, რომლის წარმოდგენაც ძნელი იყო რამდენიმე წლის უკან. მანგარკვეულწილად ჰუმანიზაცია მოახდინა ამ მონსტრის, არ მეშინია ამის თქმა;
  2. ადამიანები შეიძლება იდიოზურად იყვნენ გარეული რაღაც დანაშაულში, მაგრამ თუ არ დავუმტკიცეთ დანაშაული არ ვიჭერთ. არ იჭერდა შოთაძის პროკურატურა ასეთ ადამიანებს;
  3. თუკი შევადარებთ ამ ყველაფერს წარსულთან, სულ სხვა მოცემულობაში ვართ. რეფორმები არის ხელშესახები პროკურატურაში... მაგ გზით [ნაციონალური მოძრაობის] რომ ევლო შოთაძეს და მის პროკურატურას ერთ დღეში კიდევაც უნდა ჩამოგვეხრჩო, კიდევაც უნდა დაგვეხრიტა, კიდევაც უნდა მიგვესაჯა;
  4. შოთაძის პროკურორობის პერიოდში პროკურატურამ შეძლო გამოეძიებინა ისეთი დიდი საქმეები, რომლებიც თაროზე იყო შემოდებული. მაგალითად: გირვლიანის, რობაქიძის, ვაზაგაშვილის, სხვების და სხვების;
  5. ადამიანები ზომბები არ არიან და პროკურორი იქნება, მოსამართლე თუ პრეზიდენტი მოქმედებს ჩვეულებრივი ყოფითი პირობები. ამ კაცმა თავისი ჰუმანურობა, ადამიანურობა და ზნეობრიობა იმით აჩვენა, რომ გადაგა თანამდებობიდან. შეიძლება არაფერ შუაში იყო, ჩემო კარგო.

ბოლო არგუმენტზე კოპალიანმა ვრცლად ისაუბრა და ხორავას ქუჩაზე მომხდარი მკვლელობის საქმეზე, თანაგუნდელების მსგავსად, გირგვლიანის მკვლელობაზე გაავლო პარალელი.

"ადგა და ნახევარ საათში კაცი გადადგა. ეს წარმოუდგენელი იყო... ადგა პიროვნება, ბავშვებს ეხებოდა საქმე, ბავშვებს. ის კი არ მომხდარა, რომ მაღალჩინოსნებს, მინისტრის მოადგილებსს სასაფლაოზე წაეყვანათ და ეწამებინათ... ბავშვების ჩხუბში მოხდა უბედურება, ადგა და გადაგა პროკურორი. არ მიანიშნებს ეს შოთაძის დიდ ჰუმანურობას, კაცობას და ზნეობრიობას? მე მასეთი ზნეობრივად ამაღლებული კაცი მინდა პროკურორად".

ბრიფინგის ბოლოს მან აღნიშნა, რომ "მიესალმება" და მისთვის "ძალიან კარგია" ის ფაქტი, რომ უნივერსიტეტმა, რომელშიც ერთ კვირაში იწყებს საქმიანობას, სწორედ შოთაძე წარადგინა კანდიდატად.

"ვფიქრობ, რომ შოთაძე ზუსტად იმას გააგრძელებს, რასაც ის აკეთებდა, რომ პროკურატურა იყოს არა სადამსჯელო ორგანო და არა რაღაც ბუა, საშინელება ადამიანებისთვის, არამედ მისაღები ორგანო, სადაც ადამიანის უფლებებს იცავენ".

ირაკლი შოთაძის კანდიდატურამ გენერალური პროკურორის პოსტზე პოლიტიკურ წრეებში და სამოქალაქო საზოგადოებაში კრიტიკა გამოიწვია, რადგან მან მთავარი პროკურორის თანამდებობა პროტესტის ფონზე დატოვა. შოთაძე მას შემდეგ გადადგა, რაც თბილისის საქალაქო სასამართლოს გადაწყეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროტესტის დაწყებიდან რამდენიმე საათში გავრცელდა ხმები მისი გადადგომის შესახებ, თუმცა პროკურატურამ ეს უარყო. რამდენიმე წუთში კი ამბავი დადასტურდა და შოთაძემ წერილობით ამცნო საზოგადოებას გადადგომის შესახებ. მის გადადგომაზე გული დაწყდა და არასწორ ნაბიჯად მიიჩნია იუსტიციის მინისტრმა.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო.

გაიგეთ მეტი: