სამხრეთ კორეელი რეჟისორის, ბონგ ჯუნ ჰოს ფილმი პარაზიტი 2019 წლის ნამდვილად გამორჩეულ კინომოვლენად იქცა, რომელმაც მოახერხა ჰოლივუდური ბლოკბასტერებისა და მაღალბიუჯეტიანი სატელევიზიო შოუების გვერდით მთელი მსოფლიო მაინც არაინგლისურენოვან კინოზე აელაპარაკებინა.

სულ ახლახანს უცხოურ მედიაში გავრცელდა ინფორმაცია, რომლის თანახმადაც, ცნობილი ამერიკული სატელევიზიო კომპანია, HBO აპირებს, რომ პარაზიტი მინისერიალად გადაიღოს. სავარაუდოდ, ეს პროექტი ინგლისურენოვანი იქნება და სამსახიობო გუნდიც ჰოლივუდის ნაცნობი სახეებისგან დაკომპლექტდება.

გავრცელებულ ინფორმაციაში ნათქვამია ისიც, რომ HBO-ს სურს მის პროექტში თავად ფილმის რეჟისორი, ბონგ ჯუნ ჰოც იყოს ჩართული და ამჯერად სერიალის პროდიუსერის როლი მოირგოს. მასთან ერთად პროდიუსერის კანდიდატად განიხილავენ ფილმ Vice-ის რეჟისორ ადამ მაკკეისაც.

ბონგ ჯუნ ჰო და ადამ მაკკეი.

ფოტო: SHUTTERSTOCK

სულ ცოტა ხნის წინ, 5 იანვარს გამართულ ოქროს გლობუსის 2020 წლის დაჯილდოებაზე პარაზიტი წლის საუკეთესო უცხოენოვან ფილმად დასახელდა, მანამდე კი 2019 წლის მაისში გამართულ კანის კინოფესტივალზე ფილმს ოქროს პალმის რტო გადაეცა, როგორც წლის საუკეთესო კინოსურათს. ამით პარაზიტი პირველი სამხრეთ კორეული ფილმი გახდა, რომელმაც კინოსამყაროს ამ გავლენიან კონკურსზე გამარჯვება მოიპოვა.

აღსანიშნავია, რომ წინ გველოდება ოსკარების დაჯილდოებაც, სადაც ამ ფილმს კრიტიკოსები მთავარ ტრიუმფატორადაც კი მოიაზრებენ. თანაც ეს ყველაფერი იმის გათვალისწინებით, რომ კინოგაქირავებაში ფილმი საოცრად წარმატებული აღმოჩნდა: მისმა საერთო შემოსავლებმა $150 მილიონს მიაღწია, რაც არაჰოლივუდური კინოსთვის ნამდვილად შესაშური მაჩვენებელია.