გიორგი კვირიკაშვილი კრწანისის სასწავლო ცენტრში მომხდარ ფაქტს გამოეხმაურა. პრემიერმა ამის შესახებ დღეს 26 ოქტომბერს ისაუბრა. მისი თქმით, ჯარისკაცი მოქმედებდა მთლიანად ამ ინსტრუქციების შესაბამისად, ამიტომ ამ მიმართულებით შეკითხვები გამორიცხულია:

"კრწანისში მოხდა ძალიან სამწუხარო ინციდენტი. მოგეხსენებათ, რომ სამხედრო ობიექტებს გააჩნიათ დაცვის ძალიან მკაცრი წესები და იმ სამხედროებს, რომლებიც იცავენ სამხედრო ობიექტს, აქვთ ძალიან მკაცრად გაწერილი ინსტრუქციები. ჩვენ მზად ვართ, ნებისმიერი ალტერნატიული გამოძიებისთვის გავხსნათ კარი. მოხდა ძალიან სამწუხარო ფაქტი, ახალგაზრდა დაიღუპა. მინდა, სამძიმარი გამოვუცხადო გარდაცვლილის ოჯახს. კიდევ ერთხელ გავიმეორებ, რომ გამორიცხულია რაიმე შეკითხვა ამ ფაქტთან მიმართებაში, რადგან სამხედრო ობიექტებს აქვთ დაცვის მკაცრი წესები და ყველამ უნდა იცოდეს, რომ მისი დარღვევა არის ძალიან საფრთხილო. მე პირადად დეტალებში შევისწავლე ეს საკითხი და ჩემი აზრი გახლავთ ის, რომ სამხედროები მოქმედებდნენ მკაცრად გაწერილი ინსტრუქციების თანახმად," - განაცხადა პრემიერმა ჟურნალისტებთან საუბრისას".