ახალგაზრდა იურისტთა ასოციაცია მოითხოვს, რომ შინაგან საქმეთა მინისტრმა, ვახტანგ გომელაურმა და მისმა მოადგილემ, ნინო ცაციაშვილმა თანამდებობები დატოვონ. სულხან სალაძის თქმით, საქმის მასალებით ირკვევა, რომ არასრულწლოვანზე ზეწოლას კიდევ მინიმუმ 3 პოლიციელი ახორციელებდა.

"ჩვენ მიგვაჩნია, რომ პოლიტიკური პასუხისმგებლობა პოლიციის განყოფილებაში მომხდარ დანაშაულზე ეკისრება შინაგან საქმეთა მინისტრს და მის მოადგილეს, ნინო ცაციაშვილს. საია მოითხოვს, რომ მათ დაუყოვნებლივ დატოვონ თანამდებობები. ჩვენ ვამბობთ, რომ როდესაც სისტემების შიგნით ხდება ასეთი დანაშაული ხელმძღვანელმა უნდა აიღოს პასუხისმგებლობა", — თქვა სულხან სალაძემ.

სულხან სალაძემ თქვა, რომ ლუკა სირაძე პოლიციელებთან მარტო რამდენჯერმე დარჩა, მათ შორის, მას ცალკე ესაუბრებოდა განყოფილების უფროსი. ეს ფაქტი კი 15 დეკემბერს საჯაროდ გამართულ პრესკონფერენციაზე ნინო ცაციაშვილმა უარყო. საია მიმართავს სახელმწიფო ინსპექტორს, რომ იმ პოლიციელების ვინაობის დასადგენად, რომლებიც ფსიქოლოგიურ ზეწოლას ახორციელებდნენ ლუკა სირაძეზე გამოძიება ჩაატარონ.

მწვანე სკოლის ყოფილი მოსწავლე, რომელსაც გამოძიება სკოლის კედელზე წარწერების დატოვებას ედავებოდა, დაკითხვის შემდეგ კორპუსიდან გადმოხტა და გუშინ, 17 დეკემბერს, გარდაიცვალა. მოზარდის გარდაცვალების საქმეზე გუშინ გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.