საქართველოს იუსტიციის მინისტრის თქმით, რუსთავი 2-ის საქმეზე სტრასბურგის გადაწყვეტილება საბოლოოა და აღარ გადაისინჯება. მისი განმარტებით, ხუთმა მოსამართლემ, ე.წ. ფილტრაციის კომიტეტმა იმსჯელა და ძმები ყარამანაშვილების საჩივარი არ მიიღო.

"შესაბამისად, რუსთავი 2-ის ყოფილი გენერალური დირექტორის, ნიკა გვარამიასა და არხის ყოფილი მესაკუთრეების, ლევან ყარამანაშვილის, გიორგი ყარამანიშვილისა და შპს ტელეკომპანია საქართველოს ყველა პრეტენზია, რომელიც მათ სტრასბურგის სასამართლოს წინაშე ჰქონდათ წარდგენილი; როგორც ისინი უარყოფილი იქნა 18 ივლისს და არცერთი დარღვევა არ დადგინა, ყველა ამ ნაწილში სტრასბურგის სასამართლოს გადაწყვეტილებები არის საბოლოო და დღეიდან აღარანაირ გასაჩივრებას არ ექვემდებარება", — განაცხადა წულუკიანმა.

მანვე აღნიშნა, რომ ეს არის სახელმწიფოსა და იუსტიციის სამინისტროს დიდი გამარჯვება.

"მე ყველა იმ საჯარო მოხელეს, რომელიც სახელმწიფო ინტერესის და სიმართლის დასაცავად იყო მობილიზებული, მადლობა გადავუხადო".

გარდა ამისა, წულუკიანმა აღნიშნა, რომ ეს გადაწყვეტილება მნიშვნელოვანია უზენაესი სასამართლოსა და მისი დიდი პალატისთვის, რომელსაც ნინო გვენეტაძე ხელმძღვანელობდა. მინისტრის განმარტებით, მათ ამ საქმის გამო "მრავალი შეტევა და შეურაცხყოფელი სიტყვა დაიმსახურეს".

"ჩვენ ვიდექით ქართული მართლმსაჯულების ღირსების სადარაჯოზე ევროპაში", — აღნიშნა მან.

რუსთავი 2-ის ყოფილმა მესაკუთრეებმა, ძმებმა ყარამანიშვილებმა ტელეკომპანიის საქმეზე სტრასბურგის სასამართლოს გადაწყვეტილების დიდ პალატაში გადასინჯვა 24 ოქტომბერს ითხოვეს.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი მას მიაკუთვნეს.

არხის მფლობელებმა გადაწყვეტილება სტრასბურგში გაასაჩივრეს. მათი თქმით, დაირღვა სამართლიანი სასამართლოს პრინციპი. ადამიანის უფლებათა ევროპულმა სასამართლომ საქართველოს უზენაესი სასამართლოს გადაწყვეტილება უვადოდ შეაჩერა და ხალვაშმა წილები ვერ გადაიფორმა. თუმცა, 18 ივლისს მიღებული გადაწყვეტილებით რუსთავი 2-ის 100%-იანი წილის მფლობელი ქიბარ ხალვაში გახდა. ამავე გადაწყვეტილებით გაუქმდა შეჩერების დროებითი მექანიზმი.

ხალვაშმა წილები იმავე დღეს გადაიფორმა და არხის გენერალური დირექტორი ნიკა გვარამია გაათავისუფლა, მის ნაცვლად კი თავისი ადვოკატი პაატა სალია დანიშნა. ახალმა დირექტორმა გაათავისუფლა საინფორმაციო სამსახურის ხელმძღვანელიც, რასაც ჟურნალისტების პროტესტი მოყვა. არხი თანამშრომლების და კონტრაქტორების დიდმა ნაწილმა დატოვა. შედეგად შეიქმნა ორი ახალი ტელეკომპანია — მთავარი არხი და ფორმულა.

ქიბარ ხალვაში და რუსთავი 2

2004 წლის ზაფხულში, ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც ხელისუფლების ზეწოლით, თავიანთი 30-30%-იანი წილები, ტელევიზიის დამფუძნებლებმა დავით დვალმა და ჯარჯი აქიმიძემ იძულებით გადაუფორმეს.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირების შემდეგ, მას სხვა ბიზნესებთან ერთად რუსთავი 2-იც ჩამოართვეს. საბოლოოდ, 2011 წელს, კომპანიის მფლობელები შპს საქართველო და ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ, ხალვაშმა განაცხადა, რომ ტელეკომპანიის 50%-ს დამფუძნებლებს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ, დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.

2018 წლის 21 ოქტომბერს დვალმა და აქიმიძემ ხალვაშს თბილისის საქალაქო სასამართლოში უჩივლეს. სასამართლომ არხის 60 პროცენტს ყადაღა დაადო. საქმეზე ერთი მოპასუხე ტელეკომპანიის 100%-იანი წილის მფლობელი ქიბარ ხალვაში იქნება, ხოლო მეორე პაატა კარსანიძე, რომელსაც 2004 წელს რუსთავი 2-ის საკონტროლო პაკეტი მას შემდეგ ჩაუვარდა ხელში, რაც ხელისუფლების ზეწოლით, თავიანთი 30-30%-იანი წილები ტელევიზიის დამფუძნებლებმა, დავით დვალმა და ჯარჯი აქიმიძემ იძულებით გადაუფორმეს.