შინაგან საქმეთა სამინისტროსთან მოძრაობა #სირცხვილიას და შეცვალეს აქტივისტებმა აქცია-პერფორმანსი გამართეს. სამოქალაქოს აქტივისტი გიგა მაქარაშვილი პოლიციელებს მოუწოდებდა დაიცვან მოქალაქეები, სამართალი და არ დაემორჩილონ მხოლოდ ზემდგომ ადამიანებს.

გიგა მაქარაშვილი, TV პირველთან საუბრისას ამბობს, რომ იმედი აქვს პოლიციის ეს ინერტულობა დროებითია და ისინი კვლავ გააგრძელებენ დემონსტრანტების დაცვას.

"ექვს თვიანი უწყვეტი აქციების მანძილზე, ყველა ჩვენი აქცია იწყება და მთავრდება პოლიციისთვის მადლობის გადახდით, ახლა უნდა ვუთხრათ ჩვენი გულისტკივილი, ჩვენი თხოვნა და მოთხოვნა, დაიცვან ჩვენი უსაფრთხოება", — ამბობს მაქარაშვილი.

აქციის მონაწილეებს ჰქონდათ ბანერები წარწერებით: "დაგვიცავი ნუ ГАИწევი" და "მოძალადესთან ნუ ГАИგივდები". ГАИ რუსულენოვანი სიტყვაა, რომელიც საბჭოთა კავშირის დროინდელ საპატრულო პოლიციას ერქვა.

ამ ფორმით აქტივისტები აპროტესტებდნენ ქართული ოცნების ოფისთან მომხდარ მოვლენებს, როდესაც სამართალდამცავებმა არ დააკავეს პირები, რომლებიც არამხოლოდ აქტივისტებს, არამედ პოლიციელებსაც აყენებდნენ შეურაცხყოფას.

ბოლო დღეების მოვლენები მოკლედ

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.