პარლამენტის პირველმა ვიცე-სპიკერმა, გია ვოლსკიმ აქციის დაშლიდან პირველვე პლენალურ სხდომაზე, ისევ "ნაციონალური მოძრაობის დანაშაულებზე" ისაუბრა. მან 2004 წლის შემთხვევა გაიხსენა და თქვა, რომ ახალგაზრდებს უნდა ახსოვდეთ ვის გვერდით დგანან და ვის მოთხოვნებს ემორჩილებიან.

"ჩემი ბიუროს კუთხეში, 2004 წელს 20 წლის ახალგაზრდა დაჭრეს იმის გამო, რომ იქ არ დაემორჩილა პირველი შეძახილისთანავე პოლიციას და შემდეგ მეორე კუთხეში საკონტროლო გასროლით მოკლეს, აი, ეს მინდა შევახსენო ახალგაზრდებს, მართალია ბევრია იქ ორგანიზებული კმარელები, დღევანდელი კმარელები, მაგრამ არიან ხალხი, ახალგაზრდები ვისაც ამასთან ემოციური კავშირი არ აქვთ, მაგრამ უნდა ახსოვდეთ ვის გვერდით დგანან და ვის მოთხოვნებს ემორჩილებიან", — თქვა გია ვოლსკიმ პლენარულ სხდომაზე.

გია ვოლსკიმ, ასევე, აღნიშნა, რომ ის უხერხულობა, რასაც პარლამენტთან მობილიზებული პოლიცია ქმნის ნამცეცია იმასთან შედარებით, რომელიც შეიძლება სახლემწიფოს შეექმნას. ისი აზრით, ესაა მიზეზი, რატომაც პარლამენტმა მუშაობა უნდა გააგრძელოს.

გია ვოლსკიმ წინა ბრიფინგიც იმიტომ გამართა, რომ ნაციონალური მოძრაობის ხელისუფლებაში ყოფნის პერიოდი გაეხსენებინა. ვოლსკიმ მაშინ აღნიშნა, რომ როდესაც ეს პარტია იყო მთავრობაში, პროპორციულ საარჩევნო სისტემაზე გადასვლას მხარს არ უჭერდა და ამის საილუსტრაციოდ მიხეილ სააკაშვილის მაშინდელი განცხადება წაიკითხა.

დღეს, 26 ნოემბერს, გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.

ბოლო რამდენიმე საათის განმავლობაში დაკავებულების რაოდენობა უცნობია. On.ge ამ მონაცემების გადამოწმებას უშედეგოდ ცდილობს. იმის მიუხედავად, რომ სამართალდამცავებმა პარლამენტის ორი დეპუტატი წაიყვანეს, შსს-ს ვერსიით, ეს დაკავება არ იყო. ახლა გიგა ბოკერიაც და თენგიზ გუნავაც თავისუფალია.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.