ევროპის სახალხო პარტია (EPP) იმედგაცრუებას გამოთქვამს "მმართველი პარტიის მხრიდან გადადგმული ცინიკური და მოღალატეობრივი ნაბიჯის გამო", რა დროსაც ხალხისთვის დაპირებული საკონსტიტუციო ცვლილება ჩააგდეს. EPP-ს ევროპარლამენტის ახალ მოწვევაში ყველაზე მეტი პარლამენტარი ჰყავს. მისი პარტნიორები საქართველოში ევროპული საქართველო და ნაციონალური მოძრაობა არიან.

"საქართველოს ყველა პოლიტიკური პარტია, რომელთაც საერთაშორისო საზოგადოებაც მხარს უჭერს, თანხმდება იმაზე, რომ პროპორციული საარჩევნო სისტემა საჭიროა პლურალისტური პოლიტიკური გარემოსთვის. შექმნილ პოლიტიკურ კრიზისზე მთლიანად პასუხისმგებელია მოქმედი მთავრობა. ჩვენ მოვუწოდებთ ხელისუფლებას თავი შეიკავოს ძალის გამოყენებისგან, პატივი სცეს შეკრების უფლებას და წარმოადგინოს პრობლემის გადაჭრის გზები. კომპრომისის ვერპოვნა ქვეყანას საშიშ რელსებზე გადაიყვანს, რაც საქართველოს პარტნიორების მკვეთრ იმედგაცრუებასაც გამოიწვევს. ეს მხოლოდ მათ წისქვილზე დაასხამს წყალს, ვისაც საქართველოს ევრო-ატლანტიკური გზიდან გადახვევა სურს", — წერია 19 ნოემბერს გავრცელებულ განცხადებაში.

ბოლო დღეების მოვლენები მოკლედ

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.