პედრო პასკალი ჰარი პოტერის ავტორს, ჯოან როულინგს, "საზიზღარ ლუზერს" უწოდებს. წარმოშობით ჩილელი მსახიობი, რომელიც ლგბტქ ადამიანების აქტიური მხარდამჭერია, სწორედ ამ შეფასებით გამოეხმაურა სოციალურ ქსელში როულინგისადმი ბოიკოტის მოწოდებას.

"ჩვენი საზოგადოებრივი ვალია, წარუმატებელი გამოდგეს ნებისმიერი რამ, რაც ჰარი პოტერს უკავშირდება", — განაცხადა ინსტაგრამზე ერთ-ერთმა ქვიარ აქტივისტმა, — "რადგან შედეგი დაინახოს ამ ამაზრზენმა ნაგავმა".

ვიდეო პასკალმაც მოიწონა და კომენტარი დატოვა.

"ზუსტადაც რომ ამაზრზენი ნაგავია. საზიზღარი ლუზერის საქციელი", — წერს მსახიობი.

პედრო პასკალს, რომელსაც HBO-ის სერიალმა The Last of Us მოუტანა განსაკუთრებული პოპულარობა, არაერთხელ გაუკეთებია ლგბტქ ადამიანების მხარდამჭერი განცხადება და წითელ ხალიჩაზეც ხშირად გამოჩენილა თავისი ტრანსგენდერი დის, ლაქსის, თანხლებით.

• პედრო პასკალი ტრანსგენდერთა მხარდამჭერი მაისურით გამოჩნდა

აი, ჯოან როულინგი კი, კვლავაც ტრანსფობიის ბრალდებით, კრიტიკის ქარცეცხლში კიდევ ერთხელ გაეხვა ახლახან. მწერალმა სოციალურ ქსელში გამოაქვეყნა ფოტო, რომელშიც შამპანურითა და სიგარით აღნიშნავს დიდი ბრიტანეთის უზენაესი სასამართლოს გადაწყვეტილებას, ქალის იურიდიული განმარტება განისაზღვროს მისი დაბადებისას მინიჭებული სქესით. აღნიშნული განსაზღვრება ტრანსგენდერ ქალებს ქალებად არ ცნობს.

• "მიყვარს, როცა გეგმები სრულდება" — როულინგი შამპანურით და სიგარით აღნიშნავს ბრიტანეთის გადაწყვეტილებას, რომელიც ტრანსგენდერ ქალებს ქალებად არ ცნობს

რა ხდება როულინგის თავს

იმის მიუხედავად, რომ ჰარი პოტერი წლების შემდეგაც რჩება ფანების საყვარელ ისტორიად, ბოლო წლებში საგის ავტორი, ჯოან როულინგი, კრიტიკის სამიზნეში არაერთხელ მოხვდა. მიზეზად დიდწილად მისი შეხედულებები იქცა — მწერალი ბევრჯერ დაადანაშაულეს ტრანსფობიაში.

თავდაპირველად, ამის საფუძველი მკვლევარ მაია ფორსტეიტერის დაცვა გახდა. ეს უკანასკნელი სამსახურიდან ტრანსფობიური განცხადების — "კაცებს ქალად გახდომა არ შეუძლიათ" — გამო დაითხოვეს. მოგვიანებით, როულინგმა ტვიტერზე დაწერა, რომ "ადამიანებისთვის, რომელთაც მენსტრუაცია აქვთ, შესაფერისი სიტყვა უკვე არსებობს". შემდეგ, მწერალი თავის დეტექტიურ რომანში ბოროტმოქმედად "ქალად გადაცმული კაცის" გამოყვანისთვის გააკრიტიკეს.

• როგორ გამოეხმაურნენ ჰარი პოტერის ვარსკვლავები ჯოან როულინგის განცხადებებს ტრანსგენდერების შესახებ

კრიტიკამ კი სხვადასხვაგვარი ფორმა მიიღო — ტიკტოკის მომხმარებლები ჰარი პოტერის წიგნებსაც კი წვავდნენ. 2021 წელს როულინგმა ტვიტერზე ასევე დაწერა, რომ თავისი სახლის მისამართი "სამმა აქტივისტმა" გაასაჯაროვა. ეს ფაქტი სოციალური ქსელის ადმინისტრაციამ და შოტლანდიის პოლიციამ აღკვეთეს, თუმცა, მწერლის თქმით, მან სიკვდილის მუქარებიც კი მიიღო.

ავტორისადმი "მიმართული სიძულვილის ტალღა" არაერთმა ცნობილმა ადამიანმა, მათ შორის, ჯადოსნური არსებების მსახიობმა ედი რედმეინმა დაგმო.

2021 წელს როულინგმა ტვიტერზე სტატიაა გააზიარა, სადაც ნათქვამი იყო, რომ "პოლიცია კაცის გენიტალიების მქონე გამაუპატიურებელს ქალად აღნიშნავს, თუკი თავდამსხმელი საკუთარ თავს ქალად აიდენტიფიცირებს".

"ომი მშვიდობაა. თავისუფლება ტყვეობაა. უგუნურება ძალაა. პენისიანი ინდივიდი, რომელმაც გაგაუპატიურა, ქალია", — დაწერა მწერალმა პოსტის აღწერაში.

მწერალთან გასამიჯნად ქვიდიჩის მსოფლიო ასოციაციებმაც გადაწყვიტეს სახელის შეცვლა. ავტორი დაადანაშაულეს ანტისემიტიზმშიც.

• ჰარი პოტერი ბოლო 70 წლის განმავლობაში გამოცემულ 70 საუკეთესო წიგნს შორის ვერ მოხვდა

2022 წლის აგვისტოში, როცა მწერალ სალმან რუშდის აშშ-ში თავს დაესხნენ და ფიზიკურად გაუსწორდნენ, მოკვლით დაემუქრნენ ჯოან როულინგსაც.

ამ ყველაფრის მიუხედავად, ჰარი პოტერის სამყარო იზრდება: სულ მალე, ამ ზაფხულს, HBO პოტერიადის მიხედვით სერიალის გადაღებებს დაიწყებს.