მე მაინც არ მგონია, რომ ევროკავშირი ამ დონეს არ იკადრებს და ქართველ ხალხზე ამგვარი ზეწოლა მოხდება, — ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა ვიზალიბერალიზაციის შესაძლო გაუქმებაზე კომენტარებისას განაცხადა.

"მე მაინც არ მგონია, რომ ამ დონეს იკადრებს ევროკავშირი და ქართველ ხალხზე მოხდება იმგვარი ზეწოლა, რომელზეც ჩვენ ახლა ვსაუბრობთ. ქართველი ხალხის სულისკვეთება არის, რა თქმა უნდა, ევროპული მომავალი. ქართველმა ხალხმა დასავლეთთან, ევროკავშირთან, ნატოსთან, შეერთებულ შტატებთან ურთიერთობაში ყველაფერი გააკეთა, რომ ყველა დასავლური წამოწყების მაქსიმალურად მხარდამჭერი ყოფილიყო, მათ შორის, სამსხვერპლოზე დადო ათეულობით ადამიანის სიცოცხლე ნატოს და შეერთებული შტატების მისიებში. ეს არის დაშინების მექანიზმი. ეს არის ჯერ კიდევ მექანიზმი შემორჩენილი იმისთვის, რომ უკრაინაში ომის მსვლელობის პირობებში, "დიფ სთეითს" საქართველოს საკუთარი მიზნებისთვის გამოყენების შესაძლებლობა კვლავ დარჩეს. ეს იყო ზეწოლა ჩვენს საზოგადოებაზე, რომ მიაღებინონ არა ის გადაწყვეტილება, რომელიც ქართველ ხალხს სურს, არამედ ის გადაწყვეტილება, რომელიც სურს "დიფ სთიეთს" და ომის გამჩაღებლებს უკრაინაში, მაგრამ ბუნებრივია, ამას ვერ ეღირსებიან", — განაცხადა მათიკაშვილმა.