საქართველოს ფინანსთა სამინისტროს საგამოძიებო სამსახურის თანამშრომლებმა ქრთამის აღების ბრალდებით ქობულეთის მუნიციპალიტეტის ოთხი თანამშრომელი დააკავეს. უწყების ინფორმაციით, ამ ადამიანებს ინფრასტრუქტურული პროექტების შესრულების მონიტორინგი ევალებოდათ და შესრულებული სამუშაოების აქტებზე ხელმოწერის სანაცვლოდ ქრთამი მოითხოვეს.

"ამჟამად ტარდება შესაბამისი საგამოძიებო ღონისძიებები დანაშაულში მონაწილე სხვა პირების გამოვლენის მიზნით", — აცხადებენ ფინანსურ პოლიციაში.

საქმეზე გამოძიება გრძელდება საქართველოს სისხლის სამართლის კოდექსის 338-ე მუხლის პირველი ნაწილით. ამ მუხლით, მოხელის მიერ თანამდებობის უფლებამოსილების გამოყენებისთვის ფულის მოთხოვნა ისჯება თავისუფლების აღკვეთით ვადით ექვსიდან ცხრა წლამდე.