მმართველი პარტიის დამფუძნებელმა, ბიძინა ივანიშვილმა საქართველოს მართლმადიდებელი ეკლესიის საპატრიარქოში მიმდინარე მოვლენებზე არ ისაუბრა. ზურაბ ტყემალაძის საიუბილეო საღამოზე მისულ ივანიშვილს კითხვები ჟურნალისტებმა დაუსვეს.

უმრავლესობის ლიდერი, გია ვოლსკი ირწმუნება, რომ ივანიშვილთან ამ საკითხზე საუბარი არ ყოფილა და თუ ჟურნალისტებს პარტიის დამფუძნებლის პოზიცია აინტერესებთ, კითხვა მას უნდა დაუსვან:

"არა, ეს მას უნდა ჰკითხოთ... ჩვენ გავაკეთეთ კომენტარი და არ მგონია ჩვენგან განსხვავებული პოზიცია ჰქონდეს".

საპატრიარქოში ბოლო ერთ კვირაში განვითარებული მოვლენები

26 ოქტომბერს ბოდბელმა ეპისკოპოსმა, მეუფე იაკობმა TV პირველთან სატელეფონო ინტერვიუში ყოფილ პრემიერ გიორგი კვირიკაშვილის კაბინეტში გამართული შეხვედრა გაიხსენა, სადაც, მისივე განცხადებით, "ეჩალიჩებოდნენ პატრიარქ ილია მეორის გადაყენებაზე და შიო მუჯირის პატრიარქად არჩევაზე".

მისი თქმით, შეხვედრას ესწრებოდა სამი ადამიანი: ვახტანგ გომელაური, გიორგი გახარიას და გიორგი კვირიკაშვილი.

კითხვაზე, პრემიერთან შეხვედრაზე განიხილებოდა პატრიარქის ტახტიდან ჩამოცილება, თუ მკვლელობა, იაკობმა უპასუხა:

"ყველაზე კარგი ვარიანტი იყო, რომ მოეკლათ... მე მაგას არ დავუშვებ. არც დიმიტრი [შიოლაშვილი], არც პეტრე [ცაავა], არც სხვები, არც ბატონი ბიძინა [ივანიშვილი]... მე შემიძლია გამოვიდე და ყველა მაგათზე ვთქვა, რას აკეთებდნენ, რას აშავებდნენ. ჭკვიანად თუ არ იქნებიან, გადავუვლი თავზე, რომ ჰგონია რომ ქვეყნის ხელმძღვანელია...".

31 ოქტომბერს სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".

მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ