ბოლო ორი დღეა სოციალურ ქსელებსა და პოლიტიკურ წრეებში განსაკუთრებული მონდომებით აკრიტიკებენ და იცავენ ქართული ოცნების თავმჯდომარის შვილს, ბერა ივანიშვილს. მიზეზი "მსოფლიოს ფილტვების" გადასარჩენად გადარიცხული თანხაა.

მომღერალი ISA- ს სოციალურ-ეკოლოგიური ინსტიტუტის "ტყის შვილების" ელჩი გახდა და ტყისა და ტყის ხალხების უფლებების დასაცავად უნდა იბრძოლოს. საქმიანობა მან მსოფლიოში ყველაზე დიდი ტყიდან დაიწყო და 1,1 მილიონი დოლარი გადარიცხა ამაზონის ჯუნგლების დასახმარებლად.

ბერამ აღნიშნა, რომ თანხის ნაწილი მისი დანაზოგია, ნაწილი კი ოჯახის "შეწირულობაა". მან ყველას მოუწოდა "მოქმედებისკენ". ამ რჩევამ და იმ ფაქტმა, რომ მმართველი პარტიის თავმჯდომარის შვილი სხვა ქვეყნის პრობლემების მოსაგვარებლად იბრძვის, კრიტიკა გამოიწვია.

მმართველ პარტიაში მსგავსი რეაქცია არაადეკვატური ჰგონიათ. ისინი კრიტიკას მიუღებელს უწოდებენ და იმ საკითხებზე საუბრობენ, რაც ივანიშვილების ოჯახმა საქართველოსთვის გააკეთა.

პრემიერ-მინისტრი ფიქრობს, რომ ბერას კრიტიკა "ორმაგი უსამართლობაა". მისი თქმით, პირველი უსამართლობა არის ქველმოქმედების აქტზე შეტევა, მეორე კი ივანიშვილის ოჯახზე თავდასხმა.

"ბიძინა ივანიშვილის ოჯახი ამ ქვეყანას ეხმარება ისტორიული მემკვიდრეობის გადარჩენაში, შენარჩუნებაში, ამასთან, ასობით მილიონს ხარჯავს მომავალ თაობაზე საგანმანათლებლო პროექტებში. როდესაც ახალგაზრდა ადამიანის ქველმოქმედება პოლიტიკური თავდასხმის საგანია, აბსოლუტურად მიუღებელია", — ამბობს ის.

ეკონომიკის მინისტრი და ქალაქის მერი კი განმარტავენ, რომ გლობალურ სამყაროში ვცხოვრობთ და ამაზონის ტყის ხანძარი მხოლოდ ბრაზილიის პრობლემა არ არის.

"ის, რომ ჩვენ რაღაც ჩვენი პატარა წვლილი შეგვაქვს, რომ დავეხმაროთ ცეცხლის ლიკვიდაციაში, ცუდი რა არის ამაში, თან საუბარია ადამიანზე, რომელსაც უამრავი ქველმოქმედება აქვს გაკეთებული საქართველოში. ძირითადად ჩვენ ვისმენდით გაკოტრებული პოლიტიკოსების მხრიდან ამ ტიპის განცხადებებს", — ამბობს კალაძე.

ნათია თურნავა კი აცხადებს, რომ ივანაშვილი გლობალური მეცენატია და არაფერია გასაკვირი იმაში, რომ მხოლოდ საქართველოს განვითარებას არ უთმობს ყურადღებას.

"არამედ ისეთ გლობალურ პრობლემებს, როგორიც არის კლიმატური ცვლილებები. ჩვენ ვცხოვრობთ გლობალურ სამყაროში და ყველაფერი მოქმედებს საქართველოზეც. ეკოლოგიური გამოწვევები ერთ-ერთი დიდი საფრთხეა, რომელზეც ყველამ უნდა იზრუნოს", – ამბობს ის.

სამთავრობო გუნდის გარდა, ამ საკითხს გამოეხმაურენ მმართველი პარტიის დეპუტატებიც. ადამიანის უფლებათა კომიტეტის თავმჯდომარე სოფო კილაძეს მიაჩნია, რომ საკუთარი ჯიბიდან დახარჯული თანხა აჟიოტაჟის საგანი არ უნდა ხდებოდეს.

"ბერას და მის ოჯახს უამრავი სიკეთე აქვს გაკეთებული ამ ქვეყნისთვის და ეს ყველამ კარგად ვიცით, მათ შორის იმათაც, ვინც ასე თავგამოდებული ლანძღავს ივანიშვილების ოჯახს", — დაწერა მან ფეისბუქზე.

დეპუტატმა, აკაკი ზოიძემ კი აღნიშნა, რომ სირცხვილია კითხვის დასმაც კი იმაზე, თუ რა გააკეთა ივანიშვილმა საქართველოსთვის. ზოიძის განცხადებით, ვინც ამაზე ქილიკობს, ან არაფერი ესმის ეკოლოგიისა და ქველმოქმედების, ან მიზანმიმართულად ცდილობს "ივანიშვილის ოჯახის უპრეცენდენტო ქველმოქმედების" დისკრედიტაციას.

"სამ მილიარდზე მეტი უკვე დახარჯულია ივანიშვილების მიერ სხვადასხვა სფეროში. ეროვნული მნიშვნელობის პროექტების დაფინანსება გრძელდება. თუმცა, დარწმუნებული ვარ, რომ ამას ჩვენი საზოგადოება შეხსენების გარეშეც კარგად ხედავს", — თქვა ზოიძემ.

დეპუტატ წილოსანისთვის კი ბერას შემთხვევა აღმოჩნდა მაგალითი, რომელმაც ქველმოქმედების მინუსებზე აალაპარაკა. მისი თქმით, ვისაც ხშირად ეხმარები იწყებს ფიქრს, რომ ეს დახმარება მხოლოდ მას და არავის სხვას აღარ ეკუთვნის, რაც ცუდია.

"არადა რა კარგი შინაარსი აქვს ქველმოქმედებას", — დაამატა მან.