პარლამენტის ჯანდაცვის კომიტეტის თავმჯდომარე, აკაკი ზოიძე ამბობს, რომ კითხვის დასმა, თუ რა გააკეთა ივანიშვილების ოჯახმა საქართველოსთვის, უბრალოდ, სირცხვილია. ამის შესახებ ზოიძემ ბერა ივანიშვილის მიერ ამაზონის ჯუნგლების დახმარებაზე წამოწყებულ დისკუსიასთან დაკავშირებით თქვა.

ზოიძის განცხადებით, ვინც ამაზე ქილიკობს, ან არაფერი ესმის ეკოლოგიისა და ქველმოქმედების, ან მიზანმიმართულად ცდილობს "ივანიშვილის ოჯახის უპრეცენდენტო ქველმოქმედების" დისკრედიტაციას.

"სამ მილიარდზე მეტი უკვე დახარჯულია ივანიშვილების მიერ სხვადასხვა სფეროში. ეროვნული მნიშვნელობის პროექტების დაფინანსება გრძელდება. თუმცა, დარწმუნებული ვარ, რომ ამას ჩვენი საზოგადოება შეხსენების გარეშეც კარგად ხედავს", — თქვა ზოიძემ.

გუშინ, 22 ოქტომბერს ბერამ საკუთარ ფეისბუქზე გამოქვეყნებულ ვიდეოში თქვა, რომ 1,1 მილიონი დოლარი გადაურიცხა ორგანიზაციას ამაზონის ჯუნგლების გადასარჩენად.