გენერალური პროკურორი შალვა თადუმაძე ამბობს, რომ პროგრეს ბანკის საქმეზე ინფორმაციას არ ფლობს. ჟურნალისტებთან საუბრისას მან განაცხადა, რომ ამ საკითხით დაინტერესდება.

თიბისის დამფუძნებელმა, მამუკა ხაზარაძემ მთავარი არხის ეთერში პროგრეს ბანკის აქციების ყიდვაზე საუბრისას ქართული ოცნების თავმჯდომარე ბიძინა ივანიშვილთან შეხვედრა გაიხსენა. ხაზარაძის თქმით, 2016 წელს, როცა თიბისი ბანკი რესპუბლიკას შეძენას გეგმავდა, ეროვნულმა ბანკმა ტრანზაქცია "ახსნა-განმარტების გარეშე შეაჩერა". მისივე თქმით, ივანიშვილმა მას პროგრეს ბანკის შეძენა თხოვა და დააყოლა, რომ ამ შემთხვევაში იქნებ რესპუბლიკა ბანკის გარიგებაც დასრულებულიყო.

მისივე თქმით, მან უცხოურ ორგანიზაციას დაუკვეთეს აუდიტი, რომელმაც პროგრეს ბანკში "არასასურველი მდგომარეობა" დააფიქსირა და ფულის გათეთრებასთან დაკავშირებული ტრანზაქციების ეჭვები გააჩინა. ეროვნულმა ბანკმა თიბისის მიმართა, პროგრეს ბანკის საეჭვო ტრანზაქციებზე სამართალდამცავებს აცნობოს.

თბილისის მერი კახა კალაძე, რომელიც პროგრეს ბანკის დამფუძნებელი იყო, ამბობს, რომ ბანკს ფულის გათეთრებასთან არანაირი შეხება არ ჰქონია და არც აუდიტი ჩატარებულა.

პროგრეს ბანკი 2007 წელს კახა კალაძემ დააფუძნა და 100-პროცენტიან წილს ფლობდა. ბანკი 2016 წლამდე, იმ დრომდე ფუნქციონირებდა, სანამ აქტივების ნაწილი თიბისიმ იყიდა. 2012 წლიდან ბანკის 21,79 პროცენტი ბიძინა ივანიშვილს, დანარჩენი რუს ბანკირს, ილია გავრილოვს ეკუთვნოდა. გავრილოვი რუსეთში დიმიტრი მედვედევთან გარიგებაში მონაწილეობდა. დეივ ბლოსისა და ნინო ბაქრაძის სტატიის მიხედვით, რომელიც აიფაქტზე გამოქვეყნდა იგი 2015-2016 წლებში პროგრეს ბანკის საკონტროლო პაკეტს ფლობდა.