"ბატონი ხაზარაძე გამოდის და იძახის რაღაცები გადავარჩიეო. რა გადაარჩია? რას ნიშნავს? ფუნთუშეულია და ქიშმიშები ამოიღო?" — ასე გამოეხმაურა თბილისის მერი კახა კალაძე მამუკა ხაზარაძის განცხადებას პროგრეს ბანკთან დაკავშირებით.

თიბისის დამფუძნებელმა ხაზარაძემ განაცხადა, რომ 2016 წელს პროგრეს ბანკის ყიდვა ბიძინა ივანიშვილმა მოსთხოვა. მისივე თქმით, მან უცხოურ ორგანიზაციას დაუკვეთეს აუდიტი, რომელმაც პროგრეს ბანკში "არასასურველი მდგომარეობა" დააფიქსირა და ფულის გათეთრებასთან დაკავშირებული ტრანზაქციების ეჭვები გააჩინა. როგორც ხაზარაძე ამბობს, პროგრეს ბანკში მათ მხოლოდ ჯანსაღი აქტივები იყიდეს.

თბილისის მერი კახა კალაძე, რომელიც პროგრეს ბანკის დამფუძნებელი იყო, ამბობს, რომ ბანკს ფულის გათეთრებასთან არანაირი შეხება არ ჰქონია და არც აუდიტი ჩატარებულა.

"ვინც ბანკთან მიმართებით ერკვევა და გარკვეული შეხება აქვს, მსოფლიოში ვერ დამისახელებთ ვერც ერთ ბანკს, რომლის პორტფელში არ იყოს მაგალითად, ცუდი კრედიტები, ის კომპანიები, ვინც სესხს ვერ ემსახურება ან პირიქით", — განაცხადა კალაძემ გადაცემა 360 გრადუსში.

პროგრეს ბანკი 2007 წელს კახა კალაძემ დააფუძნა და 100-პროცენტიან წილს ფლობდა. ბანკი 2016 წლამდე, იმ დრომდე ფუნქციონირებდა, სანამ აქტივების ნაწილი თიბისიმ იყიდა. 2012 წლიდან ბანკის 21,79 პროცენტი ბიძინა ივანიშვილს, დანარჩენი რუს ბანკირს, ილია გავრილოვს ეკუთვნოდა. გავრილოვი რუსეთში დიმიტრი მედვედევთან გარიგებაში მონაწილეობდა. დეივ ბლოსისა და ნინო ბაქრაძის სტატიის მიხედვით, რომელიც აიფაქტზე გამოქვეყნდა იგი 2015-2016 წლებში პროგრეს ბანკის საკონტროლო პაკეტს ფლობდა.

ამავე თემაზე: