ეროვნული ბიბლიოთეკის, მოძრაობა ეკვილიბრიუმის მხარდაჭერით, კომპანია გალფის სპონსორობითა და ორგანიზაცია "სამართლიანობა და თანასწორობის" პროექტის "განათლება ძალადობის წინააღმდეგ" ფარგლებში ოჯახური ძალადობის მსხვერპლთა სახელმწიფო თავშესაფრებში სპეციალური სივრცეები მოეწყობა, სადაც ბიბლიოთეკები განთავსდება.

სულ საქართველოში ოჯახური ძალადობის მსხვერპლთა ექვსი თავშესაფარი არსებობს: თბილისის კრიზისული ცენტრი, თბილისის თავშესაფარი, ასევე ქუთაისის, გორის, ბათუმის, სიღნაღის თავშესაფრები. საბიბლიოთეკო სივრცის მოწყობა ყველა მათგანში იგეგმება. ამ ეტაპზე კი სამუშაოები თბილისის თავშესაფარში დაიწყო.

"უცხოეთში მოღვაწე ქართველი ხელოვანი ნატალია ამირეჯიბი (დე პიტა) ქმნის ესკიზს ძლიერი ქალის გამოსახულებით და თავშესაფრის ერთი კედელი, რომელსაც ფემინისტური კედელი დავარქვით, ასე მოიხატება. სივრცეში განთავსდება თაროები, მაგიდები, მცენარეები, წიგნები. წიგნებით მომარაგებას ეკვილიბრიუმი უზრუნველყოფს. ერთი სიტყვით, ყველაფერი გაკეთდება იმისთვის, რომ თავშესაფრის ბენეფიციარებს განტვირთვის, დასვენების, მუსიკის მოსმენის, წიგნის წაკითხვის საშუალება ჰქონდეთ. თავშესაფარი დახურული დაწესებულებაა. მისი მისამართიც კი უცნობია საზოგადოებისთვის. ამდენად, აქ მყოფი ბენეფიციარებისთვის, რომლებიც გარესამყაროს, ფაქტობრივად, მოწყვეტილნი არიან, ასეთი სივრცის მოწყობა განსაკუთრებით მნიშვნელოვანია. ეს სივრცე მათ საშუალებას მისცემს თავშესაფრის კედლებს გასცდნენ, განიტვირთონ, იფიქრონ და რაც მთავარია, საზოგადოების მხარდაჭერა იგრძნონ" — აცხადებს ორგანიზაცია "სამართლიანობა და თანასწორობის" თავმჯდომარე ნინი სალუქვაძე.

ნინი სალუქვაძე

"ოჯახური ძალადობის მსხვერპლთა თავშესაფრებში ბიბლიოთეკების მოწყობა აქ მყოფ ბენეფიციარებს რეაბილიტაციაში, ფსიქოლოგიური პრობლემების დაძლევაში, საზოგადოებაში თავიანთი ადგილის დაბრუნებაში დაეხმარება. ეს თემა ჩვენთვის ძალიან სენსიტიური და მნიშვნელოვანია, ამიტომაც გადავწყვიტეთ ეროვნულ ბიბლიოთეკასთან ერთად მათი როგორც მატერიალური, ისე მორალური მხარდაჭერა. გალფი თავშესაფრებს ბიბლიოთეკების ავეჯით და სხვა ინვენტარით მოწყობაში დაეხმარება" — აცხადებს კომპანია გალფის ვიცე-პრეზიდენტი, ნინჩო ჯიბლაძე.

ნინჩო ჯიბლაძე

"მორიგი ძალიან მნიშვნელოვანი ამბავი: საქართველოში არსებულ, ოჯახში ძალადობის მსხვერპლთა სახელმწიფო თავშესაფრებში, სადაც მხოლოდ ქალები არიან, ბიბლიოთეკები მოეწყობა შესაბამისი სამკითხველოებით. პროექტს ეროვნული ბიბლიოთეკის საგანმანათლებლო მოძრაობა ეკვილიბრიუმი და ორგანიზაცია "სამართლიანობა და თანასწორობა" განახორციელებენ, მხარდამჭერი კი ჩვენი ტრადიციული პარტნიორი, კომპანია გალფი იქნება" — აცხადებს ეროვნული ბიბლიოთეკის დირექტორი გიორგი კეკელიძე.

გიორგი კეკელიძე