პატრიოტთა ალიანსის ახალგაზრდულომა ორგანიზაციამ აშშ-ის სახელმწიფო მდივნის ყოფილი თანაშემწის, დევიდ კრამერის პერსონა ნონ გრატად გამოცხადების მოთხოვნით საგარეო საქმეთა სამინისტროსთან აქცია გამართა.

მათი თქმით, თუ მოთხოვნა არ დაკმაყოფილდება, კიდევ შეიკრიბებიან. აქციის მონაწილეებს თან ჰქონდათ პლაკატები: "საქართველო არ არის საცდელი ლაბორატორია", "საქართველო ეკუთვნის ქართველ ხალხს", "აეკრძალოს ამერიკელ დიპლომატ დევიდ კრამერს საქართველოში შემოსვლა".

10 სექტემბერს თბილისში, სასტუმრო რუმსში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ კონფერენციაზე პატრიოტთა ალიანსის ლიდერის, ირმა ინაშვილის მისვლას ხმაური და დაპირისპირება მოჰყვა.

კონფერენციის ორგანიზატორებმა ინაშვილს განუმარტეს, რომ ის არ იყო სიაში, შესაბამისად, კონფერენცია უნდა დაეტოვებინა. ინაშვილმა კი თქვა, რომ ამავე კონფერენციაზე დეპუტატმა, გიგა ბოკერიამ მისი მისამართით ცილისმწამებლური განცხადება გააკეთა და ის პასუხის გასაცემად მივიდა.

ამის შემდეგ ფლორიდის საერთაშორისო უნივერსიტეტის მკვლევარმა, აშშ-ის სახელმწიფო მდივნის ყოფილმა თანაშემწემ, დევიდ კრამერმა ინაშვილს მოუწოდა, შენობა დაეტოვებინა, რის შემდეგადაც მათ შორის სიტყვიერი დაპირისპირება მოხდა.