ბათუმის ბულვარში ნაციონალური მოძრაობის წევრები და მათი მხარდამჭერები საპროტესტო აქციას მართავენ. შეკრებილები აპროტესტებენ, პრემიერ მამუკა ბახტაძის ვიზიტს ბათუმში კაფე რვაფეხას გახსნაზე. მათი თქმით, იმის ფონზე, რაც გუგუტიანთკარში ხდება და როგორც რეაგირებს ხელისუფლება, სამარცხვინოა კაფის ფოიერვერკებით გახსნა და პირველი პირის ვიზიტი.

მათივე თქმით, სცადეს პრემიერთან მიახლოება და იმის თქმა, რომ პასუხისმებლობა უნდა აიღოს მომხდარზე და არამხოლოდ გიორგი გახარია, არამედ ის და მთელი ქართული ოცნება უნდა წავიდეს, თუმცა პოლიციამ ამის საშუალება არ მისცა.

მამუკა ბახტაძემ რეაბილიტირებული რვაფეხა დაათვალიერა და ბათუმელებს მიულოცა კაფის აღდგენა. რეაბილიტაცია ფონდ ქართუმ დააფინანსა..

ფოტო: მთავრობის პრესსამსახური

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა. 15 აგვისტოს საოკუპაციო რეჟიმმა მუშაობა განახლა. რუსი სამხედროებმა ე.წ. საზღვარი გაავლეს საქართველოს მოქალაქეების, რაზმაძეებისა და გუგუტიშვილების ნაკვეთებში. საოკუპაციო ხაზს მიღმა მოექცა მათი საცხოვრებელი სახლი, ყანები და სავარაუდოდ, წყლის რეზერვუარი. საოკუპაციო რეჟიმმა სამი დღე მისცა ადგილობრივებს, სახლების დასაცლელად. რაზმაძეების ოჯახმა სახლი მთლიანად დაშალა და საშენი მასალა გამოიტანა.

მოსახლეობა დახმარებას ითხოვდა, თუმცა პრეზიდენტი, პრემიერი, პარლამენტის თავმჯდომარე და გორის მერი სოფელში რამდენიმე დღე არ გამოჩენილან.

ბახტაძე სოფელ გუგუტიანთკარში ბორდერიზაციის უკანონო პროცესის დაწყებიდან 2 კვირაში ჩავიდა, თუმცა დაზარალებულ ოჯახებს არ შეხვედრია. პრესსამსახურის გავრცელებული ინფორმაციიდან ირკვევა, რომ პრემიერი ესტუმრა მარღიშვილის ოჯახს, რომელმაც ის ტელევიზიით მიიწვია. თუმცა როგორც On.ge-ს პრესსამსახურმა დაუდასტურა ის არ შეხვედრია გუგუტიშვილებისა და რაზმაძეების ოჯახს.