პრემიერ-მინისტრი, მამუკა ბახტაძე და პარლამენტის თავმჯდომარე არჩილ თალაკვაძე 20 აგვისტოს, უკანონო ბორდერიზაციის დაწყებიდან ორი კვირის შემდეგ სოფელ გუგუტიანთკარში ჩავიდნენ. ისინი საოკუპაციო ხაზთან მდებარე სოფელში გვიან ღამით მედიის გარეშე იმყოფებოდნენ.

პრემიერი სოფელში გოჩა მარღიშვილის ოჯახს ესტუმრა, რომელმაც პრემიერს ტელევიზიით შეხვედრა სთხოვა, თუმცა უცნობია შეხვდა თუ არა ის რაზმაძეებისა და გუგუტიშვილების ოჯახებს, რომელთაც უკანონო ბორდერიზაციის გამო საკუთარი სახლების დაშლა და დატოვება მოუწიათ.

მთავრობის ადმინისტრაციის ინფორმაციით, საოკუპაიო ხაზთან ბახტაძემ ინფრასტრუქტურულ პროექტებზე ისაუბრა.

"მოსახლეობის თხოვნით მალე გადაიჭრება სასმელი წყლის მიწოდების პრობლემა, დავასრულეთ გზის მშენებლობა, მოვაწყეთ სარწყავი ინფრასტრუქტურა. ელექტროენერგიითა და ბუნებრივი გაზით ადგილობრივი მოსახლეობა უზრუნველყოფილია", — აღნიშნა პრემიერმა.

როგორც პრემიერმა აღნიშნა, ადგილობრივი ახალგაზრდების თხოვნით გუგუტიანთკარში ახალგაზრდებისთვის სპორტული ინფრასტრუქტურა მოეწყობა. მისივე თქმით, სოფელში შემოსავლის წყაროს გაჩენა მოსახლეობისთვის სასიცოცხლოდ მნიშვნელოვანია.

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო. რუსი სამხედროები ძელებს არჭობენ საქართველოს მოქალაქეების, რაზმაძეებისა და გუგუტიშვილების ნაკვეთებში. ე.წ. საზღვარს მიღმა ექცევა მათი საცხოვრებელი სახლი, ყანები და წყლის რეზერვუარი. საოკუპაციო რეჟიმმა სამი დღე მისცა ადგილობრივებს სახლების დასაცლელად. მათ სახლი დაშალეს და საშენი მასალა გამოიტანეს.

ამავე თემაზე: