სოფელ გუგუტიანთკარში, სადაც რუსი სამხედროები ნაკვეთებს ღობავენ, ადგილობრივი მცხოვრები თინა ბიძინაშვილი ჰყვება, რომ ოკუპანტები კიდევ უფრო სიღრმეში შემოიჭრნენ.

"მიაქვთ ნაწილ-ნაწილ, ნაგლეჯ-ნაგლეჯ, ნაკუწ-ნაკუწ და ისხედით თბილისში მშვიდად, თქვენი ხომ არაფერი იკარგება და ვითომ თქვენი არ არის,მარტო ჩემია ესა და ჩემი ოჯახისა, სულსა რომ ვღაფავთ, ყოველდღე რომ გათენდება, რა გავაკეთო, რითი ვარჩინო ჩემი ოჯახის წევრები", — ამბობს ადგილობრივი რუსთავი 2-თან საუბარში.

თინა ბიძინაშვილიმა პირველ არხთან საუბარში თქვა, რომ საუბარია არა რომელიმე ნაკვეთზე, არამედ იმაზე, რომ მთელი სოფელი მოწყდება უბანს:

"ომის დროს რომ რუსის ჯარი იდგა, ის სახლიც ხო გადაწვეს და დარჩა კიდევ ერთი დიდი ოთახი, რომელსაც მე სათავსოდ ვიყენებდი, ისიც მიაქვთ თავისი ნაკვეთით... მაჩვენეს ის რუკა, რითაც ხელმძღვანელობენ, ტელეფონში აქვთ და ვკითხე, იმ ბანერებს რომ დგამდით-მეთქი, რატომ მაშინათვე არ შემოავლეთ ეს, ნაბიჯ-ნაბიჯ, მისხალ-მისხალ ნელ-ნელა რომ იპარებით მეთქი, გაეცინა, წავიდა".

ფოტო: კადრი ვიდეოდან / რუსთავი 2

დღეს, 15 აგვისტოს გორის მუნიციპალიტეტის სოფელ გუგუტიანთკარში საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ადგილზე არიან საქართველოს შინაგან საქმეთა სამინისტროს წარმომადგენლები. სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.