საგარეო საქმეთა სამინისტროს განცხადებით, ჟენევის საერთაშორისო მოლაპარაკებების 37-ე რაუნდი შედგა. უწყების ცნობით, შეხვედრაზე ყურადღება გამახვილდა აფხაზეთსა და ცხინვალის რეგიონში მიმდინარე მილიტარიზაციასა და მუდმივ სამხედრო წვრთნებზე. როგორც საგარეო საქმეთა სამინისტრო წერს, რუსეთის ფედერაციისა და საოკუპაციო რეჟიმების წარმომადგენლებმა აღნიშნულ საკითხზე არაკონსტრუქციული დამოკიდებულება გამოიჩინეს:

"მათ უარი განაცხადეს, განეხილათ საქართველოს პრაგმატული წინადადება ძალის არგამოყენების შესახებ მონაწილეთა ერთობლივი განცხადების პროექტზე, სადაც საუბარი იქნებოდა შესაბამისი მექანიზმებით ძალის არგამოყენების უზრუნველყოფისა და 2008 წლის 12 აგვისტოს ცეცხლის შეწყვეტის შეთანხმების იმპლემენტაციის თაობაზე".

ჟენევის მოლაპარაკებების მორიგი შეხვედრა 5 ოქტომბერს შედგა. პირველი სამუშაო ჯგუფის ფარგლებში განიხილეს საქართველოს ოკუპირებულ ტერიტორიებზე - აფხაზეთსა და ცხინვალის რეგიონში - უსაფრთხოებისა და სტაბილურობის საკითხები, ხოლო მეორე სამუშაო ჯგუფში - იძულებით გადაადგილებულ პირთა და ლტოლვილთა საკუთარ საცხოვრებელ სახლებში უსაფრთხო და ღირსეულ დაბრუნებასთან დაკავშირებული საკითხები.

საგარეოს განცხადებით, ორივე სამუშაო ჯგუფში თანათავმჯდომარეებმა და მონაწილეებმა საქართველოდან და აშშ-დან პრიციპულად დააყენეს სოფელ ხურჩაში მომხდარ მკვლელობაში დამნაშავე პირის დაკავების აუცილებლობა.

უწყება განცხადებაში წერს, რომ ხაზი გაესვა საოკუპაციო ხაზის გასწვრივ მავთულხლართებისა და სხვა ხელოვნური ბარიერების აღმართვის მიუღებლობას, რაც მათივე განცხადებით, კიდევ უფრო ართულებს ომის შედეგად დაზარალებული ადგილობრივი მოსახლეობის ჰუმანიტარულ მდგომარეობას. უწყების ცნობით, განხილვის თემები იყო:

• საოკუპაციო ხაზზე ადამიანთა უკანონო დაკავებისა და გატაცების პრაქტიკა,
• თავისუფალი გადაადგილებისა და მფლობელობაში არსებულ მიწებზე წვდომის შეზღუდვა.
• აფხაზეთის მიმართულებით სოკუპაციო ხაზზე ე.წ. „გამშვები პუნქტების“ შემცირების ნეგატიური გავლენა თავისუფალი გადადგილებაზე.
• ადგილზე ვითარების დესტაბილიზაციად შეფასდა ასევე ოკუპირებულ რეგიონებში მცხოვრები ქართველების ეთნიკური დისკრიმინაცია, მათ შორის, მშობლიურ ენაზე განათლების მიღების აკრძალვა და ახალი რეგულაციების შემოღება.

საგარეო საქმეთა სამინისტროს ცნობით, მეორე სამუშაო ჯგუფში განიხილეს ოკუპირებულ ტერიტორიებზე ადამიანის უფლებებისა და ჰუმანიტარული კუთხით არსებული მდგომარეობა, მათ შორის:

• იძულებით გადაადგილებულ პირთა და ლტოლვილთა დაბრუნების საკითხის არსებითი განხილვის მნიშვნელობა,
• ოკუპირებულ აფხაზეთში მცხოვრები ქართველი მოსახლეობისთვის მშობლიურ ენაზე განათლებისა და ამ კუთხით ქმედითი ზომების დროულად მიღების აუცილებლობა.
• სახელმწიფო საკუთრებაში არსებული უძრავი ქონების უკანონო გასხვისების თაობაზე საოკუპაციო რეჟიმის გადაწყვეტილება,
• ასევე კულტურული მემკვიდრეობის დაცვის მიზნით თანამშრომლობის მნიშვნელობა.

როგორს სამინისტროს განცხადებაში წერია, რუსეთის ფედერაციისა და საოკუპაციო რეჟიმის წარმომადგენლები ტრადიციულად შეეცადნენ ჰუმანიტარული თემების პოლიტიზირებას და მეორე სამუშაო ჯგუფში მოლაპარაკებების მიწურულს, იძულებით გადაადგილებულ პირთა და ლტოლვილთა დაბრუნების საკითხის განხილვისას, დატოვეს დარბაზი.

მოლაპარაკებებს თანათავმჯდომარეობდნენ ევროკავშირის, გაერო-სა და ეუთო-ს წარმომადგენლები და ესწრებოდნენ მონაწილეები საქართველოდან, რუსეთის ფედერაციიდან და ამერიკის შეერთებული შტატებიდან. მოლაპარაკებებში მონაწილეობდნენ ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი და აფხაზეთის ავტონომიური რესპუბლიკის მთავრობის თავმჯდომარე ისევე, როგორც ცხინვალისა და სოხუმის საოკუპაციო რეჟიმების წარმომადგენლები.

ჟენევის საერთაშორისო მოლაპარაკებების მორიგი რაუნდი გაიმართება 2016 წლის 13-14 დეკემბერს.