ფინანსური პოლიციის ინფორმაციით, დიდი ოდენობით სახელმწიფო ქონების მოტყუებით დაუფლებისთვის ბრალი 7 პირს წაუყენეს.

უწყების ცნობით, ბრალდებულებმა, მიწის ნაკვეთების მიღება-ჩაბარების ყალბი აქტების გამოყენებით, მოტყუებით დაირეგისტრირეს და თაღლითურად მიისაკუთრეს, თბილისის ზღვის მიმდებარე ტერიტორიაზე, სახელმწიფო საკუთრებაში არსებული 9 000 კვ.მ მიწის ნაკვეთები. მიწის საბაზრო ღირებულება 164 000 ლარს აღემატება.

გამოძიება საქართველოს სისხლის სამართლის კოდექსის 180-ე მუხლის მესამე და 362-ე მუხლის პირველი ნაწილებით მიმდინარეობს. დანაშაული 6-დან 9 წლამდე თავისუფლების აღკვეთას ითვალისწინებს.