Mastercard თავის მომხმარებელს გადახდის დადასტურების ახალ სისტემას სთავაზობს. ინტერნეტში თქვენთვის სასურველი ნივთის შეძენის, სასტუმროს დაჯავშნის ან ნებისმიერი სხვა გადახდის შემთხვევაში, პაროლებისა და სხვა იდენტიფიკატორების ნაცვლად მასტერკარდი თქვენს სელფის ან თითის ანაბეჭდს გამოიყენებს.

თითის ანაბეჭდით ავტორიზაცია და შესყიდვის დადასტურება ახალი გამოგონება არ არის. ამ ტექნიკას ქართული აპებიც იყენებენ. სელფით გადახდა უკვე სხვა ამბავია - ჩამოტვირთავთ სპეციალურ აპს, გადაიღებთ ფოტოს, რის შედეგადაც მასტერკარდი თქვენი სახის ციფრულ მონაცემებს შეინახავს. რა მოხდება თუ ვინმე თქვენს ფოტოს ამობეჭდავს და აპის მოტყუებას შეეცდება? აპს ამისგან დამცავი მექანიზმიც აქვს - ვერიფიკაციის მომენტში ის თვალების დახამხამებას მოგთხოვთ და ამით მიხვდება, რომ თქვენ თქვენ ხართ და არა ფოტო.

სერვისი ნელ-ნელა ინერგება ევროპაში და ჩრდილოეთ ამერიკაში. მასტერკარდის წარმომადგენლების თქმით, სერვისი გლობალურად ხელმისაწვდომი მომავალი წლის დასაწყისიდან იქნება.