ჩეჩნეთის რესპუბლიკის ხელმძღვანელი რამზან კადიროვი ტელეგრამზე საქართველოში მიმდინარე მოვლენებს გამოეხმაურა:

"დიდი შფოთვით ვადევნებ თვალს საქართველოს მოვლენებს. მინდა შეგახსენოთ, რომ გროზნოდან თბილისამდე სულ რაღაც 200 კილომეტრია. არაოფიციალური მონაცემებით, რუსეთში თითქმის მილიონი ქართველი ცხოვრობს. ჩვენს ხალხებს მეგობრობისა და ერთობის მრავალსაუკუნოვანი კავშირი აკავშირებთ.

საქართველოს კულტურა, ლიტერატურა, ხელოვნება მსოფლიომ რუსეთის დახმარებით შეიცნო. სწორედ ჩვენს ქვეყანაში აყვავდა ქართველი მწერლების, პოეტების, კომპოზიტორების, არტისტებისა და მსახიობების ნიჭიერება".

კადიროვის თქმით, საქართველოში ჯერ დიდია ანტირუსულად განწყობილი პოლიტიკოსების გავლენა.

"ჩვენ დავრწმუნდით, რომ ისინი დიდი ხანია ეძებდნენ ახალ საბაბს რუსეთის წინააღმდეგ ახალი ისტერიისთვის, რითაც ცდილობდნენ დასავლეთის მატარებლის წინ ყოფილიყვნენ, თუმცა მხოლოდ სარკინიგზო პლატფორმა აღმოჩნდნენ. მთელ მსოფლიოში უცხოური დელეგაციების, განსაკუთრებით საპარლამენტო დელეგაციების პატივისცემაა მიღებული. საქართველოს ხელისუფლებამ დუმის დეპუტატების უსაფრთხოება და ნორმალურად მუშაობის საშუალება არ უზრუნველყოს", — წერს კადიროვი.

გარდა ამისა, კადიროვი გამოეხმაურა საქართველოს პრეზიდენტ სალომე ზურაბიშვილს და თქვა, რომ "იმაზე უკეთესი ვერაფერი იპოვა, რომ მოსკოვი საქართველოსა და მისი მოსახლეობის გაყოფით". მისივე თქმით, პირიქით, რუსეთი დაინტერესებულია, რომ საქართველოში მშვიდობამ დაისადგუროს:

"დროა საქართველოს ხელისუფლებამ გაიგოს, რომ არ ჰყავს რუსეთზე უფრო ახლო მეზობელი, არ ჰყავს სხვა სახელმწიფო, რომელიც ბედის ჟამს ყველაზე ყველაზე სრაფად გამოუწოდებს დახმარების ხელს".

20 ივნისის აქცია

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ, რომელიც, მისი დის თქმით, უბრალო გამვლელი იყო და აქციაში არ მონაწილეობდა. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი. ამ დროისთვის კლინიკებში მკურნალობას 54 პირი აგრძელებს.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.