ევროკავშირის საგარეო საქმეთა მინისტრების 18 ნოემბრის შეხვედრაზე გადაწყდა, რომ ევროკავშირის ტექნიკური მისია საქართველოში ჩამოვა და განვითარებულ მოვლენებს შეისწავლის. სანქციებსა თუ უვიზო რეჟიმის შეჩერებაზე, ევროკავშირში კონსენსუსი არაა, — ამის შესახებ რადიო თავისუფლება წერს.

გამოცემის ინფორმაციით, საქართველოს ხელისუფლების წარმომადგენლებისთვის სანქციების დაწესებას უნგრეთი და სლოვაკეთი ეწინააღმდეგებიან, ეჭვს გამოთქვამენ ბულგარეთი და იტალიაც.

ლიეტუვის საგარეო საქმეთა მინისტრმა, გაბრიელიუს ლანდსბერგისმა განაცხადა, რომ ლიეტუვა საქართველოში ჩატარებულ არჩევნებს თავისუფლად და სამართლიანად არ მიიჩნევს. ის აგრეთვე გამოვიდა მოწოდებით, რომ საქართველოში ჩატარდეს დამოუკიდებელი საერთაშორისო გამოძიება არჩევნების შესახებ.

თავის მხრივ, გერმანია წინააღმდეგია, რომ ევროკავშირმა საქართველოს უვიზო მიმოსვლა შეუჩეროს.

"საქართველოს საკითხზე ცალსახა გადაწყვეტილება არ მიღებულა. იყო ფართო დისკუსია", — თქვა საგარეო საქმეთა მინისტრების შეხვედრის დასრულების შემდეგ იან ლიპავსკიმ, ჩეხეთის საგარეო საქმეთა მინისტრმა.


შეგახსენებთ, რომ ამ დრომდე უნგრეთი ერთადერთი ქვეყანაა ევროკავშირის წევრ 26 ქვეყანას შორის, რომელმაც საქართველოს მმართველ პარტიას არჩევნებში გამარჯვება მიულოცა. უნგრეთის პრემიერმინისტრი, ვიქტორ ორბანი საქართველოში 29 ოქტომბერს ჩამოვიდა. მას საქართველოს პრემიერმინისტრმა ირაკლი კობახიძემ უმასპინძლა.

ევროკავშირის ლიდერები აღნიშნავენ, რომ საქართველოსთვის ალიანსის კარი ღია რჩება, თუმცა ევროინტეგრაციის პროცესი იქამდე იქნება შეჩერებული, სანამ მთავრობა კურსს არ შეცვლის.