ქართული ოცნების წევრი, ზაქარია ქუცნაშვილი ამბობს, რომ რა კადრებიც ნახა, გუშინ პარლამენტთან პოლიციის მხრიდან ძალის გადამეტებას ადგილი არ ჰქონია. მისივე თქმით, იმედს უყურებდა. ამის შესახებ ქუცნაშვილმა ქართული ოცნების ოფისში განაცხადა.

"მე რაც ვნახე, იმ კადრებზე [პოლიციის მხრიდან ძალადობა] არ ყოფილა. მე ვუყურებდი ტელეკომპანია იმედს, შესაბამისად, მე რაც ვნახე, იქ პირიქით, პოლიცია სამი საათის გაანავმლობაში იყო ფიზიკური ძალადობის ქვეშ", — თქვა ქუცნაშივლმა.

მისივე განცხადებით, გუშინ განვითარებულ მოვლენებზე ის პასუხისმგებლობას არ იღებს. მისივე თქმით, პასუხისმგებლობა სრულად ეკისრება ოპოზიციას, რადგან მათ გააკეთეს პარლამენტში შეჭრისა და ძალადობის მოწოდებები.

ქუცნაშვილმა ოცნების ოფისში განაცხადა, რომ საპარალამენტო მანდატს ტოვებს. მისი თქმით, მას პარლამენტში თანამდებობა არ აქვს და მხოლოდ ამ მანდატის დატოვება შეუძლია.

ქუცნაშვილმა მანდატის დატოვების შესახებ მას შემდეგ განაცხადა, რაც მისი ორგანიზებით გამართული ასამბლეის ფარგლებში რუსმა დეპუტატმა საქართველოს პარლამენტის შენობაში პარლამენტის თავმჯდომარის ადგილი დაიკავა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს". პროტესტის შემდეგ კონფერენცია შეწყდა.

პარლამენტის თავმჯდომარის, პრემიერისა და შინაგან საქმეთა მინისტრის გადადგომის მოთხოვნით გუშინ, 20 ივნისს, 19 საათზე პარლამენტის შენობასთან აქცია გაიმართა, რომელიც ბოლოს წყლის ჭავლის, ცრემლსადენი გაზითა და რეზინის ტყვიებით დაშალეს.