თანასწორობის მოძრაობა და მედიის განვითარების ფონდი თბილისი პრაიდის შესახებ შინაგან საქმეთა სამინისტროს განცხადებას დამამცირებლად, ანტისახელმწიოებრივად და ანტიკონსტიტუციურად აფასებენ. სამინისტროში აცხადებენ, რომ პრაიდის ჩატარება დაგეგმილ ფორმატსა და ადგილებში შეუძლებელია. პრაიდის ორგანიზატორების თქმით, შსს-მ მათ ღირსების მარშის ჩასატარებლად მათ დახურული სივრცე შესთავაზა.

თანასწორობის მოძრაობისა და MDF-ის თქმით, ეს პოზიცია ნათლად წარმოაჩენს სახელმწიფოს დისკრიმინაციულ დამოკიდებულებას, მჩაგვრელობასა და გულგრილობას საკუთარი ლესბოსელი, გეი, ბისექსუალი და ტრანსგენდერი მოქალაქეებისადმი. მათივე თქმით, 2012 წლიდან აქტივისტები ამ პრობლემას მუდმივად აწყდებიან.

"შსს-ს მთავარ არგუმენტად მოჰყავს გარემოება, რომ მათ ძალებს აღემატება დიდი რაოდენობის კონტრდემონსტრანტების შეკავება და იმ ძალადობის თავიდან აცილება, რომელიც, შესაძლოა, ლგბტ ადამიანების შეკრებას მოჰყვეს. სამწუხაროდ, ეს არგუმენტი ჩვენი მოსახლეობის და საერთაშორისო პარტნიორების თვალში შესაძლოა, ლეგიტიმურად აღიქმებოდეს", — ნათქვამია განცხადებაში.

ორგანიზაციების განცხადებით, ამ წლების მანძილზე სახელმწიფოს არ გადაუდგამს სათანადო ნაბიჯები არსებული აგრესიის შესამცირებლად. მათი თქმით, სამოქალაქო საზოგადოების არაერთი მოთხოვნისა და რეკომენდაციის მიუხედავად, სახელმწიფოს არც ერთხელ არ ჩაუტარებია საინფორმაციო და ცნობიერების ასამაღლებელი კამპანიები, არ უმუშავია განათლების სიტემის რეფორმაზე თანასწორობის იდეის გასავრცელებლად, ძალადობისა და ჩაგვრის პრევენციაზე, საზოგადოებაში არსებული რადიკალური ჯგუფების გაუვნებელყოფასა და რადიკალიზაციის ეკონომიკური, კულტურული და სოციალური მიზეზების ახსნასა და მოგვარებაზე. მათივე თქმით, პირიქით, სახელმწიფო ახალისებს ჰომოფობიას საკონსტიტუციო თუ საკანონმდებლო ინიციატივებით, გამონათქვამებით, რადიკალური ჯგუფებისადმი ლოიალური მიდგომით, რელიგიის პოლიტიკური ინსტრუმენტალიზაციითა და დანაშაულის წახალისებით.

ამ მიზეზებიდან გამომდინარე თანასწორობის მოძრაობადა MDF სახელმწიფოს მოთხოვნებს უყენებს საზოგადოებაში ჰომოფობიისა და ტრანსფობიის შესამცირებლად. მათ შორის:

• საჯაროდ ისაუბრონ ლგბტ ადამიანების უფლებრივი მდგომარეობის შესახებ ქვეყანაში და საზოგადოებას აუხსნან ის მიზეზები, რის გამოც ლგბტ აქტივისტებს წართმეული აქვთ უფლება საჯაროდ შეიკრიბონ და გააპროტესტონ თავიანთი გაუსაძლისი ყოველდღიურობა არსებულ სოციალურად უთანასწორო, ჰომოფობიურ გარემოში;
• განახორციელონ კონკრეტული და ხელშესახები საკანონმდებლო რეფორმები ლგბტ ადამიანების მდგომარეობის გასაუმჯობესებლად, რომელთა შესახებაც არაერთი რეკომენდაციაა გაცემული წლების მანძილზე;
• აღასრულონ არსებული კანონმდებლობა და სათანადო პასუხისმგებლობით მოეკიდონ სიძულვილით მოტივირებული დანაშაულების გამოძიებას და დამნაშავე პირების პასუხისგებას;
• შეწყვიტონ ლგბტ ადამიანების სიცოცხლის უფლებით მანიპულირება საარჩევნო ხმების დასაგროვებლად და ამ გზით მოსახლეობაში ჰომოფობიური განწყობების გაღვივება/წახალისება;
• გაატარონ აუცილებელი რეფორმა განათლების სისტემაში მიმღებლობის და თანასწორობის პრინციპების დასანერგად და გასავრცელებლად;
• გამოიკვლიონ საზოგადოებაში არსებული რადიკალური ჯგუფების დაფინანსება, პოლიტიკური კავშირები და რადიკალიზაციის სოციო-ეკონომიკური და კულტურული მიზეზები და დასახონ აღნიშნული პრობლემების მოგვარების და რადიკალიზაციის პრევენციული სტრატეგია.

აღსანიშნავია, რომ თანასწორობის მოძრაობა თბილისი პრაიდს ორგანიზებას არ უწევს და პროცესში ჩართული არ არის.

შინაგან საქმეთა სამინისტროში მიღებული გადაწყვეტილება პროცესში ჩართული პირების უსაფრთხოებითა და რისკებით ახსნეს.

"თბილისი პრაიდის ჯგუფს შეეთავაზა გამოხატვის სხვა შესაძლებლობები და შეკრების ისეთი ალტერნატივები, რომელიც უფრო უსაფრთხო იქნება მონაწილე პირებისთვის", — აღნიშნეს სამინისტროში.

პრაიდის ორგანიზატორების თქმით, მათ საკლუბო სცენა ან სტადიონი შესთავაზეს.

"ეს დამოკიდებულება გვინდა შევაფასოთ, როგორც ჩვენი სამოქალაქო, საბაზისო და პოლიტიკური უფლებების შელახვა. კერძოდ, შეკრების, მანიფესტაციის და გამოხატვის თავისუფლების შეზღუდვა. ამაზე გვექნება შესაბამისი რეაგირება, ვაპირებთ მივმართოთ სტრასბურგის სასამართლოს", — თქვა ერთ-ერთმა ორგანიზატორმა, მარიამ კვარაცხელიამ.

თბილისში 18-დან 23 ივნისის ჩათვლით LGBTQI პრაიდი უნდა გაიმართოს. კვირეულის ფარგლებში სხვადასხვა სოციალური, კულტურული და პოლიტიკური ღონისძიება გაიმართება. პრაიდის ფარგლებში რამდენიმე ღონისძიება ჩატარდება, მათ შორისაა საერთაშორისო კონფერენცია, "ღირსების მარში" და სოციალური სპექტაკლი. ორგანიზატორები აცხადებდნენ, რომ ღირსების მარშს ცენტრალურ გამზირზე გაიმართება, მაგრამ არა რუსთაველზე.