ტომ ფელტონმა ჰარი პოტერის ავტორ ჯოან როულინგს მხარდაჭერა გამოუცხადა. ინგლისელ მსახიობს, რომელმაც პოტერიადის ეკრანიზაციაში დრაკო მალფოი განასახიერა, Tony-ის დაჯილდოების ცერემონიაზე ჰკითხეს, რას ფიქრობდა როულინგის გარშემო შექმნილ ხმაურიან განხილვაზე. ტრანსფობიაში არაერთხელ დადანაშაულებული მწერალი ბოლო პერიოდშიც ბევრმა ცნობილმა ადამიანმა გააკრიტიკა, მათ შორის, პედრო პასკალმა, რომელმაც ავტორს "საზიზღარი ლუზერი" უწოდა.

როულინგის შეხედულებებს წლების წინ დაუპირისპირდნენ ჰარი პოტერის ფილმებში მთავარი როლების შემსრულებლები — დენიელ რედკლიფი, რუპერტ გრინტი და ემა უოტსონი — რასაც ავტორსა და მსახიობებს შორის ურთიერთობის გამწვავება მოჰყვა; შეკითხვაზე, თუ რომელი მსახიობები აკარგვინებენ ფილმისადმი ინტერესს პირდაპირ, ბრიტანელმა მწერალმა სწორედ პოტერიადის სამეულზე მიანიშნა.

სამეულისგან განსხვავებით, როულინგი ან მისი შეხედულებები ღიად არასდროს გაუკრიტიკებია ტომ ფელტონს, რომელიც ამბობს, რომ ეს საკამათო განხილვა მასზე არ მოქმედებს.

"საკუთარ თავს სულ იმას ვახსენებ, როგორ გამიმართლა, რომ მსოფლიოში მოგზაურობა შემიძლია. აი, ახლა ნიუ-იორკში ვარ", — აღნიშნავს ფელტონი, — "არაფერი მინახავს, მსოფლიოს ისე აერთიანებდეს, როგორც პოტერიადა. და ეს სწორედ მისი [როულინგის] დამსახურებაა. ასე რომ, უზომოდ მადლიერი ვარ".

როულინგისადმი მხარდაჭერა ფელტონს წინათაც გამოუხატავს. უამრავი თაობის გასახარებლად მასზე მეტი არავის გაუკეთებიაო, განაცხადა მსახიობმა 2022 წელს.

"სულ მახსოვს, რამდენად დადებითი როლი ითამაშა სფეროში მისმა შემოქმედებამ და თავად მან, როგორც პიროვნებამ", — თქვა მაშინ ტომმა, — "მხოლოდ რამდენჯერმე შევხვედრივარ, თუმცა, ყოველთვის ძალიან თბილი იყო და ამისთვის მადლობელი ვარ".

აღსანიშნავია, რომ ფელტონი სულ მალე მონატრებულ როლსაც დაუბრუნდება: ბროდვეის სპექტაკლში ჰარი პოტერი და დაწყევლილი ბავშვი იგი კვლავ დრაკო მალფოის განასახიერებს. ინგლისელ კინოვარსკვლავს გამოშვებული აქვს ავტობიოგრაფიული წიგნიც ჯადოსნურ ჯოხს მიღმა, სადაც ბავშვობაში მოპოვებულ პოპულარობაზე ჰყვება.

რა ხდება როულინგის თავს

ფოტო: Getty Images

იმის მიუხედავად, რომ ჰარი პოტერი წლების შემდეგაც რჩება ფანების საყვარელ ისტორიად, ბოლო წლებში საგის ავტორი, ჯოან როულინგი, კრიტიკის სამიზნეში არაერთხელ მოხვდა. მიზეზად დიდწილად მისი შეხედულებები იქცა — მწერალი ბევრჯერ დაადანაშაულეს ტრანსფობიაში.

თავდაპირველად, ამის საფუძველი მკვლევარ მაია ფორსტეიტერის დაცვა გახდა. ეს უკანასკნელი სამსახურიდან ტრანსფობიური განცხადების — "კაცებს ქალად გახდომა არ შეუძლიათ" — გამო დაითხოვეს. მოგვიანებით, როულინგმა ტვიტერზე დაწერა, რომ "ადამიანებისთვის, რომელთაც მენსტრუაცია აქვთ, შესაფერისი სიტყვა უკვე არსებობს". შემდეგ, მწერალი თავის დეტექტიურ რომანში ბოროტმოქმედად "ქალად გადაცმული კაცის" გამოყვანისთვის გააკრიტიკეს.

კრიტიკამ კი სხვადასხვაგვარი ფორმა მიიღო — ტიკტოკის მომხმარებლები ჰარი პოტერის წიგნებსაც კი წვავდნენ. 2021 წელს როულინგმა ტვიტერზე ასევე დაწერა, რომ თავისი სახლის მისამართი "სამმა აქტივისტმა" გაასაჯაროვა. ეს ფაქტი სოციალური ქსელის ადმინისტრაციამ და შოტლანდიის პოლიციამ აღკვეთეს, თუმცა, მწერლის თქმით, მან სიკვდილის მუქარებიც კი მიიღო.

ავტორისადმი "მიმართული სიძულვილის ტალღა" არაერთმა ცნობილმა ადამიანმა, მათ შორის, ჯადოსნური არსებების მსახიობმა ედი რედმეინმა დაგმო.

2021 წელს როულინგმა ტვიტერზე სტატიაა გააზიარა, სადაც ნათქვამი იყო, რომ "პოლიცია კაცის გენიტალიების მქონე გამაუპატიურებელს ქალად აღნიშნავს, თუკი თავდამსხმელი საკუთარ თავს ქალად აიდენტიფიცირებს".

"ომი მშვიდობაა. თავისუფლება ტყვეობაა. უგუნურება ძალაა. პენისიანი ინდივიდი, რომელმაც გაგაუპატიურა, ქალია", — დაწერა მწერალმა პოსტის აღწერაში.

მწერალთან გასამიჯნად ქვიდიჩის მსოფლიო ასოციაციებმაც გადაწყვიტეს სახელის შეცვლა. ავტორი დაადანაშაულეს ანტისემიტიზმშიც.

2022 წლის აგვისტოში, როცა მწერალ სალმან რუშდის აშშ-ში თავს დაესხნენ და ფიზიკურად გაუსწორდნენ, მოკვლით დაემუქრნენ ჯოან როულინგსაც.

ამ ყველაფრის მიუხედავად, ჰარი პოტერის სამყარო იზრდება: HBO პოტერიადის მიხედვით სერიალის გადაღებებს ამ ზაფხულს დაიწყებს. პროექტის აღმასრულებელი პროდიუსერი სწორედ როულინგია.

ასევე იხილეთ: