"ეს იყო კარგად დაგეგმილი სპეცოპერაცია, რომელსაც ხელმძღვანელობდა ის სპეცსამსახურები, რომლებსაც აქვთ შესაძლებლობა მოისმინონ ჩანაწერები, განახორციელონ ადევნება, თვალთვალი," — ამის შესახებ მაგისტრატ მოსამართლესთან გამოკითხვაზე მისვლამდე ნაციონალური მოძრაობის ყოფილმა წევრმა კოტე იოსელიანმა ჟურნალისტებთან საუბრისას თქვა.

იოსელიანი აცხადებს, რომ არ ენდობა შინაგან საქმეთა სამინისტროს.

"ეს იყო კარგად დაგეგმილი სპეცოპერაცია, რომელსაც ხელმძღვანელობდა ის სპეცსამსახურები, რომლებსაც აქვთ შესაძლებლობა მოისმინონ ჩანაწერები, განახორციელონ ადევნება, თვალთვალი, ასე შემდეგ და ასე შემდეგ და ასევე ხელი შეუწყონ ისეთ ჯგუფებს, რომლებთანაც მე მქონდა კომუნიკაცია, რომ მათ თავისუფლად იმოქმედონ და თავისუფლად შეასრულონ ის დავალებები, რა დავალებაც შეასრულეს.

შინაგან საქმეთა სამინისტროს მიმართ მაქვს აბსოლუტურად ნულოვანი ნდობა. მე თვითონ მქონია გარკვეული შეხება სამართალდამცავ სტრუქტურასთან და ამით ვამაყობდი ყოველთვის და ვიამაყებ, თუმცა დღესდღეობით ვთვლი, რომ შინაგან საქმეთა სამინისტრო – ეს არ არის ის ორგანო, რომელიც საქართველოს მოქალაქეების უსაფრთხოებას ემსახურება, ამიტომ აქ მოსვლის მოტივაციაც, სიმართლე რომ გითხრათ, არ მქონდა იმიტომ, რომ ზუსტად ვიცი, რომ ეს პროცესი, ახლა რაც გაიმართება, ეს იქნება უბრალოდ ფორმალობა რომელსაც მათ კანონი ავალდებულებს. არანაირი მოლოდინი არ მაქვს, რომ შინაგან საქმეთა სამინისტრო ახლა დადგება და მოქალაქეების, მით უმეტეს, ისეთი პოლიტიკური საკითხების შესახებ, როგორიც ეს არის, დადგება და მართლა რეალურ გამოძიებას ჩაატარებს. ამიტომ მაქვს კონკრეტული მიზეზი. არ ვენდობი შინაგან საქმეთა სამინისტროს, არ ვაღიარებ ისეთ ორგანოდ, რომელიც იცავს ამ ქვეყნის მოქალაქეებს.

ამოცნობადი არცერთი არ არის, ყველანი ყოველთვის იყვნენ ნიღბებით და ცხადია, რომ ამ ნიღბებში რთულია ამოცნობა", — თქვა იოსელიანმა.

მისი თქმით, ეს იყო კლასიკური გატაცება ყველა შემადგენელი ფორმით. სასამართლოში შესვლამდე, კოტე იოსელიანმა უტა ივანიშვილსაც მიმართა - თუ ამ საკითხთან დაკავშირებით მასთან საუბარი სურს, დაურეკოს, დაელაპარაკება.

"ის, ვინც გამოხატა სოლიდარობა ჩემი ოჯახის მიმართ იმ საკითხთან დაკავშირებით, რომელიც გადამხდა მე თავს რამდენიმე დღის წინ. ეს იყო კლასიკური გატაცება ყველა შემადგენელი ფორმით, ეს მოხდა ჩემს სახლთან, ეს იყო ძალადობის ფონზე, ცხადია, იყო რამდენიმე ადამიანი, ჩვეულებრივად, როგორც ხდება, როგორც ფილმებში გაქვთ ნანახი, ალბათ, დაახლოებით ასეთი სიტუაცია იყო. თავიდან, რა თქმა უნდა, არ ვფიქრობდი ამაზე, თავიდან ვიფიქრე, რომ ეს იმის გაგრძელება იყო, როდესაც ხალხს სახლებთან ხვდებიან და მათზე ძალადობენ, თუმცა მანქანაში შეთრევის შემდეგ, თვალებზე შესაბამისი პირბადესავით რაღაცის წამოცმის შემდეგ, მივხვდი, რაშიც იყო საქმე და გადამიყვანეს არც თუ ისე შორს ჩემი საცხოვრებელი სახლიდან. ეს არის საბურთალოს ტერიტორია. ვვარაუდობ კიდევ ბევრ რამეს, ამ ეტაპზე, უბრალოდ ეს ვარაუდები არის. შემდგომში იყო ის მოთხოვნა, რა მოთხოვნაც, ცხადია, ჩემი მხრიდან შესრულდა იმიტომ, რომ მე არ ვთვლი, რომ რაიმე პრინციპულ ან მორალურ კომპრომისზე წავედი. მე ამ საკითხთან დაკავშირებით მქონდა ბოდიში მოხდილი და ხელმეორედ ბოდიშის მოხდა არ ჩავთვალე დიდ ამბად იმ ფონზე, რა ფონზეც მიმდინარეობდა ეს კომუნიკაცია და იმ კონკრეტულ საკითხზე, რა საკითხებზეც მიდიოდა საუბარი. აქ იყო ჩემს შვილებზე, მათ გადაადგილებაზე, მათ ვაკის პარკში სიარულის განრიგზე და ასე შემდეგ და ასე შემდეგ, ამაზე ჩემმა მეუღლემ ისაუბრა, ცხადია, რომ ეს არ არის ის თემა, სადაც ერთი კონკრეტული მოქალაქის მიმართ განხორციელებულ რაღაც უსამართლობასა და ძალადობაზე უნდა ვისაუბროთ, ეს არის აბსურდი და მე ამას ერთი წამითაც არ ვუშვებ. ეს არის პოლიტიკური მდგენელის მქონე აქტი, რაც განხორციელდა და ამას შესაბამისად პოლიტიკური შედეგები ექნება და აქვს კიდევაც. წარმოდგენა არ მაქვს, ვინ დაგეგმა, რატომ დაგეგმა, რას ემსახურებოდა ეს ყველაფერი, მით უმეტეს, იმ პირობებში, როდესაც მე გულწრფელი ბოდიში მართლა მქონდა მოხდილი. მინდა უტა ივანიშვილს მივმართო: "თუკი ამ საკითხთან დაკავშირებით, რაიმესთან დაკავშირებით, გინდა ჩემთან საუბარი, დამირეკე და პირადად დაგელაპარაკები, ამიტომ ეს არ არის ის საკითხი, რაც ჩვენ ორს შორის … ანუ სისულელეა უბრალოდ ამაზე საუბარი", — განაცხადა კოტე იოსელიანმა.

შეგახსენებთ, კოტე იოსელიანმა 8 ივნისს სოციალურ ქსელში გამოაქვეყნა ვიდეო, სადაც ის ოცნების საპატიო თავმჯდომარის ბიძინა ივანიშვილის შვილს, უტა ივანიშვილს მეორედ მოუხადა ბოდიში 7 წლის წინ გაკეთებული განცხადების გამო. ქმრის ვიდეოსთან დაკავშირებით ერთიანობა ნაციონალური მოძრაობის ლიდერმა, თინათინ ბოკუჩავამ განაცხადა, რომ მისი ქმარი კოტე იოსელიანი გაიტაცეს, შვილების უსაფრთხოებით ემუქრებოდნენ და სწორედ ამან განაპირობა ვიდეოს ჩაწერა.

მეტი კოტე იოსელიანის საქმეზე: