ოცნების ხელისუფლების შინაგან საქმეთა მინისტრის მოადგილემ, ალექსანდრე დარახველიძემ გგაფარ ილმაზის (თემურ ქათამაძის) თურქეთში გაძევებასთან დაკავშირებით კომენტარი გააკეთა. მისი თქმით, თემურ ქათამაძე ქვეყნიდან საქართველოს კანონმდებლობის დაცვით გააძევეს, რადგან მან არ მოისურვა ქვეყნის ნებაყოფლობით დატოვება.

"ხაზგასმით აღვნიშნავთ, რომ მისი გაძევება მოხდა საქართველოს კანონმდებლობის სრული დაცვით. სასამართლოს მიერ კანონიერ ძალაში შესული გადაწყვეტილების შესაბამისად. ამასთან, გაცნობებთ, რომ აღნიშნული პირის საქმესთან დაკავშირებით სასამართლოს 8 სხვადასხვა ინსტანციაში ჩატარდა განხილვები და სასამართლომ სრულად გაიზიარა შინაგან საქმეთა სამინისტროს მიგრაციის დეპარტამენტის პოზიცია, ასევე დაცვის მხარემ დროებითი ღონისძიების მოთხოვნით მიმართა ადამიანის უფლებათა ევროპულ სასამართლოს, რომელმაც მისი მოთხოვნა არ დააკმაყოფილა. გგაფარ ილმაზმა არ ისარგებლა ქვეყნის ნებაყოფლობით დატოვების შესაძლებლობით. შესაბამისად, მისი გაძევება იძულების წესით მოხდა საქართველოს კანონმდებლობის მოთხოვნების შესაბამისად."— თქვა ალექსანდრე დარახველიძემ.

ცნობისთვის, ბათუმელი მედროშის სახელით ცნობილი თემურ ქათამაძე, რომელიც მუჰაჯირების შთამომავალი და პროევროპული აქციების მონაწილეა გუშინ გვიან ღამით თურქეთში გააძევეს. ის ათ წელზე მეტია საქართველოს მოქალაქეობის მისაღებად იბრძვის.