კოალიცია ლელო — ძლიერი საქართველოს წევრები ნინო ქათამაძე და ვატო სურგულაძე ოცნების ხელისუფლების განათლების სამინისტროს მიერ ინკლუზიური განათლების განვითარების სამმართველოს გაუქმებას ეხმაურებიან და ამბობენ, რომ აღნიშნული გადაწყვეტილება შშმ ბავშვის, მოსწავლისა და სტუდენტის განათლების რეალიზაციაზე უარყოფითად იმოქმედებს.

"საქართველოს განათლების, მეცნიერებისა და ახალგაზრდობის სამინისტრო აუქმებს ინკლუზიური განათლების განვითარების სამმართველოს, შესაბამისად, უქმდება როგორც პოლიტიკის განმსაზღვრელი, განათლების ყველა საფეხურზე ინკლუზიური განათლების სისტემის მიმართულების მიმცემი მაკოორდინირებელი რგოლი. მიღებული გადაწყვეტილება უარყოფითად იმოქმედებს შშმ ბავშვის, მოსწავლის, სტუდენტის განათლების რეალიზაციის პროცესზე, გაუარესდება მათი მდგომარეობა და საფრთხე შეექმნება ინკლუზიური განათლების არსებობას. ვფიქრობთ, დაუყოვნებლივ უნდა აღდგეს ინკლუზიური განათლების განვითარების სამმართველო, არათუ შესუსტდეს, არამედ უნდა მოხდეს უმაღლეს საკანონმდებლო დონეზე ინკლუზიის უზრუნველყოფა. გადაწყვეტილებები უნდა მიიღებოდეს შშმ თემის, მშობელთა და პროფესიონალთა ჩართულობით. არაფერი ჩვენზე ჩვენ გარეშე!" — აცხადებს ნინო ქათამაძე.

ამავე კოალიციის წევრი ვატო სურგულაძე კი მიიჩნევს, რომ ოცნების განათლების სამინისტროს გადაწყვეტილება პოლიტიკურია. მისი განცხადებით, მსგავსი გადაწყვეტილებებით "მივალთ საბჭოთა კავშირში და დავუბრუნდებით სპეცინტერნატებს.

"რა მოხდა?! ვითომ სამმართველო გააუქმეს. ეს არის პოლიტიკური გადაწყვეტილება, ეს არის გადაწყვეტილება, რომ ინკლუზიური სწავლება ჩვენი ძალიან ბევრი ბავშვისთვის, აღარ არის პრიორიტეტი. ნაცვლად იმისა, რომ დეპარტამენტი და ცალკე მიმართულება გამოიყოს, ეგრეთ წოდებული სამინისტრო, აპირებს საერთოდ გაუქმებას. მშობლებს შევხვდი და მეკითხებიან, ინკლუზიურ სწავლებაში ჩართულ ბავშვებს სექტემბერში ასისტენტები ეყოლებათო?! აი, ეს გამოიწვია ამ აბსოლუტურად უგუნურმა გადაწყვეტილებამ! ეს ხალხი არ საჭიროებს ვიღაცის შეცოდებას ან მოწყალებას! ისინი სრულყოფილად უნდა იყვნენ ჩართულები ყველა პროცესში როგორც ქვეყნის მართვის, ბიზნესში, ხელოვნებაში. ამიტომაც, კიდევ ერთხელ, არ მოვუწოდებთ ამ სამინისტროს, არ მიმაჩნია, რომ ის ლეგიტიმურია, უბრალოდ, მოსახლეობას ვაფრთხილებ, ასე ჩვენ მივალთ საბჭოთა კავშირში, დავუბრუნდებით სპეცინტერნატებს, სპეცსკოლებს და გეტოებს, როგორიც იყო კომუნისტების დროს ფონიჭალაში უსინათლოთა დასახლება. არ გვინდა საბჭოთა კავშირი!" - განაცხადა ვატო სურგულაძემ.