შინაგან საქმეთა სამინისტროში აცხადებენ, რომ თბილისი პრაიდის ჩატარება დაგეგმილ ფორმატსა და ადგილებში შეუძლებელია. ამას კი უწყებაში პროცესში ჩართული პირების უსაფრთხოებითა და რისკებით ხსნიან. სამინისტროში ამბობენ, რომ ამის შესახებ პრაიდის ორგანიზატორებს უკვე შეატყობინეს.

"თბილისი პრაიდის ჯგუფს შეეთავაზა გამოხატვის სხვა შესაძლებლობები და შეკრების ისეთი ალტერნატივები, რომელიც უფრო უსაფრთხო იქნება მონაწილე პირებისთვის", — აღნიშნეს სამინისტროში.

თბილისში 18-დან 23 ივნისის ჩათვლით LGBTQI პრაიდი უნდა გაიმართოს. კვირეულის ფარგლებში სხვადასხვა სოციალური, კულტურული და პოლიტიკური ღონისძიება გაიმართება. პრაიდის ფარგლებში რამდენიმე ღონისძიება ჩატარდება, მათ შორისაა საერთაშორისო კონფერენცია, "ღირსების მარში" და სოციალური სპექტაკლი. ორგანიზატორები აცხადებდნენ, რომ ღირსების მარშს ცენტრალურ გამზირზე გაიმართება, მაგრამ არა რუსთაველზე.