ქართული ოცნების დეპუტატის, მარიამ ლაშხის საჩივრის საფუძველზე დაკავებულმა აქტივისტმა თათია აფრიამაშვილმა 12-დღიანი პატიმრობის შემდეგ, იზოლატორი დატოვა. აქტივისტმა "TV პირველის" ეთერში განაცხადა, რომ ადმინისტრაციული პატიმრობის შეფარდება მისთვის მოულოდნელი არ იყო და უფრო მეტსაც ელოდებოდა.

"რა თქმა უნდა ველოდებოდი კიდეც, სანამ სასამართლო პროცესი ჩატარდებოდა იქამდეც ვიცოდი, რომ აუცილებლად ამ განაჩენს გამოიტანდნენ. პირიქით, უფრო მეტ დღეს ველოდებოდი და სასამართლო დარბაზში ასე ვთქვათ ამოვისუნთქე 12 დღე, რომ გამოაცხადეს და არა 45 დღე. არა უშავს საინტერესო გამოცდილება იყო 20 წლის ასაკში. ჩემი აზრით, ბევრი წიგნი წავიკითხე, ბევრი ისეთი რამის გაკეთება მოვახერხე, რასაც გარეთ ვერ მოვახერხებდი და ყველაფერი ღირდა მოკლედ და ყველაფერი ღირს იმისთვის, რომ თავისუფალ საქართველოში ვიცხოვროთ.

ამ მომხდართან დაკავშირებით რა კომენტარს აკეთებდნენ ქართული ოცნების წარმომადგენლები ჯერ ჯერობით არ ვიცი იმიტომ რომ ტელევიზორი არ მქონდა და ცოტა ინფორმაციულ ვაკუუმში ვარ. რომ გავეცნობი, შემდეგ შემეძლება ამაზე კომენტარის გაკეთება, თუმცა ცხადია, რომ სასარგებლოს და სახარბიელოს არაფერს არ იტყოდნენ და რა ვიცი, მარიამ ლაშხს მოკითხვა აქედან ჩემგან" — განაცხადა თათია აფრიამაშვილმა იზოლატორის დატოვების შემდეგ.

ცნობისთვის, დღესვე იზოლატორი დატოვა ლიკა ლორთქიფანიძემაც, რომელიც აფრიამაშვილის მსგავსად მარიამ ლაშხის საჩივრის საფუძველზე დააკავეს.

იხილეთ ასევე:

ლიკა ლორთქიფანიძე: 19-20 წლის ბავშვები გამოგვკეტეს ციხეში იმის გამო, რომ შევეშინებინეთ, მაგრამ არაფერი გამოუვათ