თბილისი პრაიდის ორგანიზატორები აცხადებენ, რომ შინაგან საქმეთა სამინისტრომ მათ ღირსების მარშის ჩასატარებლად დახურული სივრცე შესთავაზა. ამ დახურულ სივრცეში კი საკლუბო სცენა ან სტადიონი მოიაზრებოდა. ამის შესახებ პრაიდის ერთ-ერთმა ორგანიზატორმა, გიორგი თაბაგარმა პრესკონფერენციაზე განაცხადა.

ორგანიზატორები აცხადებენ, რომ ღირსების მარშთან დაკავშირებით შინაგან საქმეთა სამინისტროსთან რამდენიმე შეხვედრა გამართეს, მათ შორის ბოლო შეხვედრა გუშინ, 30 მაისს გაიმართა. მათი თქმით, უსაფრთხოების ზომებსა და გეგმებზე საუბრის ნაცვლად შსს-ს წარმომადგენლებმა უთხრეს, რომ პრაიდის კვირეულის ღონისძიებების დაცვა შეუძლებელი იქნება.

"ეს დამოკიდებულება გვინდა შევაფასოთ, როგორც ჩვენი სამოქალაქო, საბაზისო და პოლიტიკური უფლებების შელახვა. კერძოდ, შეკრების, მანიფესტაციის და გამოხატვის თავისუფლების შეზღუდვა. ამაზე გვექნება შესაბამისი რეაგირება, ვაპირებთ მივმართოთ სტრასბურგის სასამართლოს", — თქვა ერთ-ერთმა ორგანიზატორმა, მარიამ კვარაცხელიამ.

მისი განცხადებით, პრაიდის გუნდი მოწოდებული იყო, მოლაპარაკებები სამუშაო ფორმატში ეწარმოებინა.

"მათ შორის გვქონდა ალტერნატიული მარშრუტები გათვალისწინებული და შესაძლებელი იყო ფორმატებზე მსჯელობა, თუმცა, ამ დიალოგში შსს-ს არ შემოვიდა, არ იმსჯელა და ხისტად განგვიცხადა, რომ შეკრების დაცვა შეუძლებელია და არ მოხდება მათ მიერ", — აღნიშნა კვარაცხელიამ.

გიორგი თაბარმა ასევე ისაუბრა იმაზე, რომ პრაიდის ორგანიზატორების მიმართ იყო ზეწოლისა და შიშის დათესვის მცდელობა. მისი თქმით, გუნდს "კეთილი რჩევა" მისცეს, თავადვე გაეუქმებინათ ღონისძიება. თაბაგარი ამბობს, რომ სახელმწიფო პრობლემის სათავესთან ბრძოლის ნაცვლად, ლგბტქი ჯგუფის გადამალვას ცდილობს.

ამავე თემაზე: