ოცნების პარლამენტმა სახელმწიფო აუდიტის სამსახურის გენერალურ აუდიტორად სანქცირებული ყოფილი გენერალური პროკურორი, გიორგი გაბიტაშვილი 84 ხმით აირჩია.

"გიორგი გაბიტაშვილის კანდიდატურა, საქართველოს კონსტიტუციის 69-ე მუხლის მე-2 პუნქტის, "სახელმწიფო აუდიტის სამსახურის შესახებ" ორგანული კანონის მე-9 მუხლის პირველი პუნქტისა და პარლამენტის რეგლამენტის მე-18 მუხლის მე-2 პუნქტის "შ" ქვეპუნქტისა და 2045 მუხლის შესაბამისად, პარლამენტის თავმჯდომარემ შალვა პაპუაშვილმა წარადგინა."— წერია პარლამენტის ვებგვერდზე გამოქვეყნებულ განცხადებაში.

პლენარულ სხდომაზე კენჭისყრამდე, გიორგი გაბიტაშვილის კანდიდატურის შესახებ საფინანსო-საბიუჯეტო კომიტეტმა იმსჯელა და მას მხარი დაუჭირა.

კანონის თანახმად, ახალი გენერალური აუდიტორი 5 წლის ვადით არის არჩეული.

ცნობისთვის, გენერალური აუდიტორის თანამდებობას აქამდე ცოტნე ყავლაშვილი იკავებდა, რომელიც თანამდებობიდან ვადაზე ადრე, პირადი გადაწყვეტილებით წავიდა. ყავლაშვილი ფინანსთა სამინისტროში, მინისტრის მოადგილის პოსტს დაუბრუნდა.

გიორგი გაბიტაშვილი 2 ევროპული ქვეყნის მიერაა სანქცირებული. ესტონეთმა სანქცია ოცნების სხვა 13 თანამდებობის პირთან ერთად გაბიტაშვილს 2024 წლის 16 დეკემბერს დაუწესა., გაერთიანებული სამეფოს მთავრობამ 2025 წლის 10 აპრილს, ადამიანის უფლებათა გლობალური სანქციების ფარგლებში, ოთხ ქართველ მაღალჩინოსანს, მათ შორის გიორგი გაბიტაშვილს სავიზო და ფინანსური სანქციები დაუწესა.