"მილანში საკონსულო ოპერირებს 2023 წლიდან... ვადაგასული "გახსნის" ცერემონია ე.წ. მთავრობის მონაწილეობით, რითი უნდა აიხსნას?" — ამის შესახებ საქართველოს მეხუთე პრეზიდენტი სალომე ზურაბიშვილი სოციალურ ქსელში წერს და მილანში საქართველოს საკონსულოს გახსნის ცერემონიას ეხმაურება.

როგორც მან აღნიშნა, ოცნება ამ ქმედებებით ცდილობს ხალხს აჩვენოს, რომ მათზე სანქციები არ მუშაობს.

"ასეთი რამ დიპლომატიას არ ახსოვს !!!
მილანში საკონსულო ოპერირებს 2023 წლის 24 ნოემბრიდან და კონსული ნატალია კორძაია დანიშნულია 2023 წლის სექტემბრიდან! ვადაგასული "გახსნის" ცერემონია თან ნახევარი ე.წ. მთავრობის მონაწილეობით და ზარზეიმით, მგალობელთა გუნდის ჩაყვანით ესე იგი სერიოზული ხარჯებით, რით უნდა აიხსნას?

ერთი იმით რომ აჩვენონ ხალხს, რომ მათზე სანქციები არ მუშაობს და სადაც უნდათ ჩადიან და შოპინგობენ. მეორე რომ არ ადარდებთ დიპლომატიური იზოლაცია (მაგრამ ნებისმიერი სურათი თუ ხელის ჩამორთმევა მათთვის უკვე სანატრელი და ფას დაუდებელი გახდა და აფრიალებენ ამ სურათებს ამიტომ)

ყველაფერი მოკლედ იმისთვის იმართება, რომ პოტიომკინის სოფელი არ იყოს, დაარწმუნონ მოსახლეობა რომ ყველაფერი კარგად და ძველებურად გრძელდება! რომ სახელმწიფოს წარმოადგენენ და სახელმწიფოსავით მოქმედებენ! მილანში მთელ პოლიტბიუროს გამგზავრებას ეს რომ შეეძლოს …. ????," - წერს სალომე ზურაბიშვილი

ცნობისთვის, გუშინ, 10 ივნისს იტალიის ქალაქ მილანში საქართველოს გენერალური საკონსულოს გახსნის ცერემონიალი გაიმართა. ცერემონიაში მონაწილეობდნენ ოცნების ლიდერები და მილანის მერი. ღონისძიებაზე თბილისიდან ჩავიდნენ ირაკლი კობახიძე, მაკა ბოჭორიშვილი, ლევან დავითაშვილი, დავით სონღულაშვილი, ირაკლი ჩიქოვანი, თინათინ რუხაძე და კახა კალაძე.