Pornhub-ის, YouPorn–ის და RedTube–ის მფლობელმა კომპანიამ, Aylo-მ განაცხადა, რომ საფრანგეთის მთავრობის მიერ დაწესებული ასაკობრივი რეგულაციების პროტესტის ნიშნად, ოთხშაბათიდან ეს საიტები საფრანგეთში აღარ იფუნქციონირებს.

Aylo-ის პლატფორმებზე შესვლისას გამოჩნდება შეტყობინება, რომელიც აუხსნის ფრანგ მომხმარებლებს კომპანიის ამ გადაწყვეტილების მიზეზს, მათ შორის იმასაც, რომ არ სურს დააყენოს საფრთხის ქვეშ მომხმარებლების პირადი ცხოვრების ხელშეუხებლობა — განუცხადეს კომპანიის წარმომადგენლებმა ჟურნალისტებს სამშაბათს.

Pornhub-ს, ისევე, როგორც სხვა პორნოგრაფიულ პლატფორმებს, საფრანგეთში მიღებული ახალი კანონით ევალებათ ასაკის გადამოწმების მექანიზმების ამოქმედება 7 ივნისისთვის. ეს შეზღუდვა საფრანგეთის მთავრობის მიერ 2023 წელს მიღებული ზომების ნაწილია, რომელიც მიზნად ისახავს არასრულწლოვანთა დაცვას შეუფერებელი კონტენტისგან.

Aylo–ს თქმით, ეს კანონი "მასალაზე უარყოფითად მოქმედებს", პირადი მონაცემების გავრცელებას შეუწყობს ხელს და არანაირად არ დაიცავს არასრულწლოვანებს.

ინდუსტრიის გიგანტმა Aylo-მ აქტიური წინააღმდეგობა გაუწია ფრანგ ოფიციალურ პირებს აღნიშნულ ზომებთან დაკავშირებით. კომპანიის შიდა სტატისტიკის მიხედვით, 2024 წლის მონაცემებით, საფრანგეთი Pornhub-ის მეორე უმსხვილესი ბაზარია მსოფლიოში — პირველ ადგილზეა აშშ, შემდეგ კი ფილიპინები, მექსიკა და გაერთიანებული სამეფო.

სოლომონ ფრიდმანმა, Ethical Capital Partners-ის პარტნიორმა (კომპანია, რომელსაც ეკუთვნის Aylo), ჟურნალისტებთან სამშაბათს გამართულ ბრიფინგზე განაცხადა, რომ ფრანგული კანონი არის "საშიში", "პოტენციურად კონფიდენციალურობის შემლახავი" და "არაეფექტური".

ცნობისთვის, ასაკის გადამოწმების ალტერნატიულ მექანიზმზე ევროკომისიაც მუშაობს და ამავდროულად Aylo-ს პლატფორმებს ადანაშაულებს ციფრული სერვისების აქტის დარღვევაში არასრულწლოვანთა დაცვის კუთხით.

Aylo, ისევე როგორც სოციალური მედიის გიგანტი Meta, ითხოვს ასაკის მოწყობილობის დონეზე გადამოწმების შესაძლებლობას. ფრიდმანმა აღნიშნა: "ჩვენ მზად ვართ, ვითანამშრომლოთ ოპერაციული სისტემების მწარმოებლებთან, აპლიკაციების მაღაზიებთან და სხვა ტექნოლოგიურ პარტნიორებთან, რათა უზრუნველვყოთ, რომ მხოლოდ სრულწლოვანებს ჰქონდეთ წვდომა ჩვენს პლატფორმაზე. ეს არ ნიშნავს პასუხისმგებლობაზე უარის თქმას — უბრალოდ ვფიქრობთ, რომ წვდომა უნდა შეიზღუდოს წყაროდანვე."

საფრანგეთის ციფრული საკითხების მინისტრმა, კლარა შაპაზმა, სამშაბათს პლატფორმა X-ზე გამოქვეყნებულ პოსტში Aylo სიცრუეში დაადანაშაულა და განაცხადა, რომ კომპანიამ არასწორად წარმოაჩინა კანონის არსი. მისი თქმით, ახალი ზომები პირადი მონაცემების დაცვას ითვალისწინებს. "სრულწლოვნებს აქვთ პორნოგრაფიის ყურების თავისუფლება, მაგრამ არა ჩვენი ბავშვების დაცვის ხარჯზე", — თქვა შაპაზმა.

Aylo-ს არ დაუკონკრეტებია, რამდენი ხნით აჩერებს კონტენტის მიწოდებას საფრანგეთისთვის, თუმცა, ოფიციალური განცხადების მიხედვით, კომპანია იმედოვნებს, რომ მალე მოიძებნება გამოსავალი, რომელიც გააუქმებს შეზღუდვას და აღადგენს ზრდასრულთა კონტენტზე წვდომას.