ევროკავშირმა რუსეთის წინააღმდეგ სანქციების მე-18 პაკეტი წარადგინა. ევროკომისიის პრეზიდენტის, ურსულა ფონ დერ ლაიენის განცხადებით, პაკეტი მოიცავს დამატებით შეზღუდვებს ენერგეტიკის, საბანკო საქმიანობის, ნავთობისა და სხვა სფეროებზე.

როგორც ურსულა ფონ დერ ლაიენმა აღნიშნა, ევროკავშირმა პირველად წამოაყენა შეთავაზება Nord Stream 1 და Nord Stream 2 მილსადენებთან დაკავშირებული ტრანზაქციების აკრძალვის შესახებ, ასევე ნავთობის ფასის ლიმიტის შემცირებაზე ბარელზე 60 დოლარიდან 45 დოლარამდე, რადგან რუსეთის მთავრობის შემოსავლების ერთი მესამედი კვლავ ნავთობის ექსპორტიდან მოდის.

ფონ დერ ლაიენმა დასძინა, რომ ნავთობის ფასის ლიმიტის ცვლილებები განიხილება G7-ის სამიტზე, რომელიც 15-17 ივნისს კანადაში გაიმართება.

ევროკავშირი სანქციების სიას ასევე დაამატებს კიდევ 77 "ჩრდილოვანი ფლოტის" გემს, რათა თავიდან აიცილოს რუსეთის მიერ სანქციების გვერდის ავლა და წარადგენს წინადადებას რუსული ნავთობისგან დამზადებული ნავთობპროდუქტების იმპორტზე აკრძალვის დაწესების შესახებ.

სანქციების კიდევ ერთი ნაწილი მიმართული იქნება რუსეთის საბანკო სექტორისკენ, ევროკავშირს სურს კიდევ გამოაცხადოს და სიაში შეიყვანოს 22 რუსული ბანკი, რომლებსაც აღარ შეუძლიათ SWIFT საერთაშორისო სისტემის გამოყენება.

ევროკავშირს აქვს ასევე შეთავაზება აიკრძალოს ტრანზაქციების გავრცელება მესამე ქვეყნების ფინანსურ ოპერატორებზე, რომლებიც სანქციების გვერდის ავლით რუსეთთან ვაჭრობას აფინანსებენ. გარდა ამისა, დაგეგმილია შეზღუდვების დაწესება რუსეთის პირდაპირი საინვესტიციო ფონდზე, მის შვილობილ სტრუქტურებსა და საინვესტიციო პროექტებზე.

ევროკომისიის პრეზიდენტის თქმით, ევროკავშირის შემდგომი შემზღუდავი ზომები მოიცავს 2.5 მილიარდ ევროზე მეტი ღირებულების ექსპორტის აკრძალვას (2.8 მილიარდი აშშ დოლარი), რაც მიზნად ისახავს რუსეთის ეკონომიკისთვის კრიტიკულად მნიშვნელოვანი ტექნოლოგიებისა და სამრეწველო საქონლის ხელმისაწვდომობის შეზღუდვას. ფონ დერ ლაიენის თქმით, ეს გავლენას მოახდენს დანადგარებზე, ლითონებზე, პლასტმასებსა და ქიმიკატებზე, რომლებიც გამოიყენება როგორც ნედლეული ინდუსტრიისთვის, ასევე ორმაგი დანიშნულების საქონელზე, რომლებიც გამოიყენება იარაღისა და დრონების წარმოებაში.

ევროკომისიის პრეზიდენტმა ასევე ხაზგასმით აღნიშნა, რომ ევროკავშირს სურს, რომ მისი სანქციები უფრო ეფექტური იყოს. ამრიგად, ევროკავშირი კიდევ 22 რუსულ და უცხოურ კომპანიას შეიყვანს სიაში, მათ შორის ჩინეთიდან და ბელორუსიიდან, რომლებიც პირდაპირ ან ირიბად უჭერენ მხარს რუსეთის სამხედრო და სამრეწველო კომპლექსს. ამის შედეგად, სანქცირებული კომპანიების საერთო რაოდენობა 800-ს გადააჭარბებს.

ევროკავშირის ქვეყნები წინადადების განხილვას მიმდინარე კვირაში დაიწყებენ.

ცნობისთვის, მას შემდეგ რაც 20 მაისს სანქციების მე-17 პაკეტი ამოქმედდა, უკრაინის მოკავშირეებმა განაცხადეს, რომ უკვე მუშავდებოდა შეზღუდვების ახალი პაკეტი, მას შემდეგ რაც მოსკოვმა არაერთხელ უარი განაცხადა ცეცხლის შეწყვეტაზე.