ოცნების დეპუტატის მარიამ ლაშხის საჩივრის საფუძველზე დაკავებულმა ლიკა ლორთქიფანიძემ 12-დღიანი პატიმრობის შემდეგ იზოლატორი დატოვა. გათავისუფლების შემდეგ მან ტვ პირველთან გააკეთა კომენტარიც.

მისი თქმით, დაპატიმრების გადაწყვეტილება მოულოდნელი არ ყოფილა.

"მოველოდი ჩემი დაპატიმრების გადაწყვეტილებას, რადგან უკვე ამ რეჟიმისგან, ამ დაპანიკებული ხალხისგან ყველაფერია მოსალოდნელი. შიშის საფუძველზე ნებისმიერ ადამიანს იჭერენ იმის გამო, რომ ისევ ჩვენ შეგვაშინონ, რაც არ გამოსდით. ყოველი მათი ბოროტი ნაბიჯის შემდეგ ჩვენგან უფრო მეტი მუხტი და უფრო მეტი ძალა მოდის, უფრო მეტი ბრაზი," — თქვა ლიკა ლორთქიფანიძემ

ახალგაზრდა აქტივისტმა ციხეში არსებულ ვითარებაზეც ისაუბრა.

"პირობები კარგი იყო, რა თქმა უნდა. დღეებს ის მიადვილებდა, რომ საბა ბაღდავაძე და თორნიკე სხვიტარიძე თავიდან, ხოლო შემდეგ ბექა პაპაშვილი და უჩა დააკავეს და ახლოს მყავდნენ ჩემი მეგობრები... მიადვილებდა ეს ყველაფერი იმას, რომ ჩემი დღეები ძალიან არ გაწელილიყო. ჩუმად ვლაპარაკობდით ერთმანეთთან," — აღნიშნა მან.

ლიკა ლორთქიფანიძის თქმით, პატიმრობის ნაცვლად ჯარიმის მოლოდინი არც არსებობდა. მისივე თქმით, უკვე ნათელია რატომაც მიიღო მარიამ ლაშხმა აქტივისტების მოწოდებები საკუთარ თავზე და აღნიშნა, რომ რეალურად მათი დაკავება საზოგადოების დასაშინებლად მოხდა.

"ჯარიმას ნამდვილად აღარ მოველოდი, ისე წარიმართა ჩემი პირველი პროცესი 27-ში. თავის გასამართლებელი არც არაფერი იყო. არაფერი დამიშავებია, მხოლოდ "ძირს რუსეთის დამპალი იმპერია", "რუსი მონები" და "ქოცი მონები" ვთქვი, რაც მარიამ ლაშხმა რატომღაც თავის თავზე მიიღო. უკვე ყველაფერი ნათელია რატომაც. მიზეზი ის იყო, რომ მისი მცირეწლოვანი შვილები იქ იმყოფებოდნენ და 19-20 წლის ბავშვები გამოგვკეტეს ციხეში იმის გამო რომ შევეშინებინეთ, სხვები შეეშინებინათ. მაგრამ არაფერი აღარ გამოუვათ. ბრაზი უფრო მეტი მოდის, მუხტი უფრო მეტი მოდის. წინა კვირაშიც უფრო მეტი მუხტი წამოვიდა. სტუდენტური მოძრაობები აღარ ჩერდებოდნენ. არც გაჩერდებიან, არც ჩვენ გავჩერდებით," — თქვა ლიკა ლორთქიფანიძემ.

ცნობისთვის, ოცნების დეპუტატი მარიამ ლაშხმა 17 მაისს მომხდარი ინციდენტის გამო ჯამში სამ ახალგაზრდა აქტივისტს უჩივლა — ამ დღეს ისინი ერთ-ერთ კაფეში, სადაც ლაშხი მცირეწლოვან შვილებთან ერთად იყოფებოდა, მასთან მივიდნენ შეძახილებით: "თავისუფლება რეჟიმის ტყვეებს, არა რუსულ რეჟიმს, ძირს რუსეთის მონები, არა რუსეთის მონებს..."

სასამართლოს გადაწყვეტილებით, ლიკა ლორთქიფანიძეს და თათია აფრიამაშვილს 12-12 დღიანი პატიმრობა შეეფარდათ, მაგდა მამუკაშვილს კი სასამართლომ 4000 ლარიანი ჯარიმა დააკისრა.