ოკუპირებული აფხაზეთის პრეზიდენტის, რაულ ხაჯიმბას პრესსამსახური დე-ფაქტო საგარეო საქმეთა მინისტრის, ვიაჩესლავ ჩირიკბას გადადგომის მიზეზებს განმარტავს:

"საგარეო საქმეთა მინისტრის მოვალეობის შემსრულებელმა, ვიაჩესლავ ჩირიკბამ განაცხადა, რომ შექმნილ სიტუაციაში ვერ ხედავს შესაძლებლობას, რომ აღნიშნულ პოსტზე გააგრძელოს მუშაობა და იმედი გამოთქვა, რომ აფხაზეთის საგარეო პოლიტიკური კურსი უცვლელი დარჩება.

აღნიშნულთან დაკავშირებით, საჭიროდ მივიჩნევთ განვმარტოთ, რომ მინისტრის ხელახლა არდანიშვნის მთავარი მიზეზი გახლავთ ის, რომ მან უარი განაცხადა დნესტრისპირეთის მოლდავურ რესპუბლიკაში მიმავალ დელეგაციას ჩასდგომოდა სათავეში. მან თავისი პოზიცია ამგვარად განმარტა: მოლდავეთიდან მისი დეპორტაციის შემთხვევაში, მას შესაძლოა პრობლემები შეექმნას ევროპის ქვეყნებში შესვლისას.

აღსანიშნავია, რომ აფხაზეთის საგარეო პოლიტიკური კურსი, საგარეო საქმეთა მინისტრის შეცვლის მიუხედავად, არ იცვლება, რადგან აფხაზეთის კონსტიტუციის თანახმად, პოლიტიკას პრეზიდენტი და არა მინისტრი განსაზღვრავს".

2 სექტემბერს მოლდოვის დედაქალაქ კიშინიოვის აეროპორტში აფხაზეთის ე.წ. საგარეო საქმეთა მინისტრის მოადგილე, ოლეგ არშბა მაშინ დააკავეს და შემდეგ დაადეპორტეს, როდესაც ის მოლდოვის ტერიტორიაზე არსებულ არაღიარებულ დნესტრისპირეთში აპირებდა გამგზავრებას.

Ekhokavkaza-ს ცნობით, 21 სექტემბერს ვიაჩესლავ ჩირიკბამ დაკავებული თანამდებობა დატოვა და განმარტა, რომ ამის მიზეზი "შექმნილი პირობებია". ჩირიკბას აღნიშნული თანამდებობა 2011 წლიდან ეკავა.