აშშ-ის საიმიგრაციო სისტემას აქამდე მხოლოდ საზღვარზე შემომსვლელთა გაკონტროლება შეეძლო, თუმცა, სიტუაცია, შესაძლოა, მალე შეიცვალოს. ამერიკის შინაგან საქმეთა სამინისტრო აცხადებს, რომ მომავალი ოთხი წლის განმავლობაში აეროპორტებიდან გამგზავრებულთა 97 პროცენტზე სახის ამომცნობი ტექნოლოგიის გამოყენებას გეგმავს. ეს კი იმას ნიშნავს, რომ ხელისუფლებას უკვე საზღვრის დამტოვებელთა ვინაობაც დანამდვილებით ეცოდინება და იმასაც გააკონტროლებს, ვინ დარჩა ქვეყანაში ვიზით გათვალისწინებულ თარიღზე დიდხანს.

სისტემა, რომელიც მგზავრებს თვითმფერინავში ასვლამდე უღებს ფოტოს, პირველად 2017 წელს ამუშავდა და 2018 წლის ბოლოსათვის აშშ-ის უკვე 15 აეროპორტში მოქმედებდა. თითოეული მგზავრის ფოტოსურათს სისტემა იმ მონაცემთა ბაზაში ამოწმებს, რომელშიც ვიზებისა და პასპორტების განცხადებებში თანდართული და, ასევე, უცხოელებისთვის ქვეყანაში შესვლისას მესაზღვრეების მიერ გადაღებული ფოტოებია თავმოყრილი.

სისტემის მიზანია, შექმნას ეგრეთ წოდებული ბიომეტრული გასასვლელი, რომელიც ხელისუფლებას აძლევს საშუალებას, გაიგოს, ვინ ტოვებს ქვეყანას, ვინ შემოდის ქვეყანაში და ვის აქვს დარღვეული ვიზით გათვალისწინებული თარიღები. ჟურნალ Quartz-ის სტატიაში აღნიშნულია, რომ აშშ-ის ხელისუფლება საზღვრის გადამკვეთელთა გასაკონტროლებლად ტრადიციულად ავიაკომპანიების მიერ მიწოდებულ მგზავრთა სიებს ეყრდნობოდა.

ამჟამინდელი სისტემის დანერგვის შემდეგ, სახის ამომცნობმა, 15,000 ფრენის გაკონტროლების შედეგად, ვადაგასული ვიზის მქონე 7,000 მგზავრი გამოააშკარავა. აშშ-ის საბაჟო და სასაზღვრო დაცვის (CBP) მონაცემებით, ყოველწლიურად 600,000-ზე მეტი ადამიანი არღვევს ვიზაში გაწერილ პირობებს. ამ დანაშაულისთვის განკუთვილი მაქსიმალური სასჯელი აშშ-ში შესვლის ათწლიან აკრძალვას გულისხმობს.

რაღა თქმა უნდა, ახალი სისტემა ამერიკის სახმელეთო საზღვრიდან გასვლის შემთხვევებს ვერ აღნუსხავს. კანადის ხელისუფლება აშშ-დან ხმელეთით შესული ადამიანების მონაცემებს ამერიკის CBP-ის უზიარებს. მაგრამ როცა საქმე მექსიკასთან გაყოფილ საზღვარს ეხება, აშშ მხოლოდ მას შემდეგ იგებს, ვინ დატოვა ქვეყანა, რაც ეს ადამიანი უკან შემოსვლას დააპირებს. თუმცა, ეს მდგომარეობაც შეიძლება, შეიცვალოს. CBP აცხადებს, რომ სახის ამომცნობი სისტემის გამოცდა სამხრეთ სახმელეთო საზღვარზეც იგეგმება.

კრიტიკოსები შიშობენ, რომ მილიონობით ადამიანის ფოტოსურათებით შექმნილი მონაცემთა ბაზა ადამიანის უფლებებისთვის საფრთხეს წარმოადგენს. მსგავსი ბაზის არსებობის პირობებში ყოველთვის იარსებებს იმის შესაძლებლობა, რომ მასზე წვდომას სხვა სააგენტოები მიიღებენ და ის საყოველთაო საძიებელ ინსტრუმენტად გადაიქცევა.

სისტემის ამჟამინდელმა ვერსიამ სატესტო საფეხურის გავლა 2017 წელს, ატლანტადან ტოკიოში გაფრენილი ერთი რეისის მგზავრებისთვის ფოტოსურათების გადაღებით დაიწყო. თავდაპირველად ფართომასშტაბიანი საგამოცდო ეტაპის დაწყება 2018 წლის დასაწყისში იგეგმებოდა, მაგრამ ტრამპის ადმინისტრაციამ პროგრამა დაასწრაფა და სახის ამომცნობმა ტექნოლოგიამ უკვე 2017 წლის ზაფხულისთვის დაიწყო რამდენიმე აეროპორტში მუშაობა.