საქართველოს სახალხო დამცველის აპარატის განცხადებით, ნინო ლომჯარია უზენაესი სასამართლოს მოსამართლეთა არჩევის წესთან დაკავშირებით პარლამენტს მიმართავს და კანონპროექტში არსებულ ხარვეზებზე ისაუბრებს. ეს პირველი შემთხვევაა, როცა ომბუდსმენი გამოიყენებს პარლამენტის რეგლამენტით განსაზღვრულ კომპეტენციას და მოხსენებით მიმართავს დეპუტატებს.

ლომჯარიას თქმით, პარლამენტის თავმჯდომარემ საჯაროდ განაცხადა, რომ ვენეციის კომისიის მოსაზრების მიღებამდე კანონპროექტის მეორე მოსმენით არ მიიღებდნენ, მაგრამ დღეს კანონპროექტს განიხილავენ ისე, რომ საზოგადოებას მიზეზები არ განუმარტეს. მისი განცხადებით, კანონპროექტის ასე ფორსირებულად განხილვა გახდა იმის მიზეზი, რომ პარლამენტისთვის მიმართვა გადაწყვიტა.

დღეს, 15 აპრილს იურიდიულ კომიტეტთა სხდომაზე უზენაესი სასამრთლოს მოსამართლეთა არჩევის წესს მეორე მოსმენით განიხილავენ. იურიდიულ საკითხთა კომიტეტის დეპუტატების ნაწილი, ასევე არასამთავრობო ორგანიზაციების წევრები მოითხოვენ, რომ ქართული ოცნების კანონპროექტი უზენაესის მოსამართლეების არჩევის შესახებ ვენეციის კომისიის დასკვნის შემდეგ განიხილონ. როგორც ოპოზიციისთვის, ისე სასამართლოს თემაზე მომუშავე ორგანიზაციებისთვის გაუგებარია, რატომ დაარღვია პირობა ქართულმა ოცნებამ და კანონპროექტის განხილვა ვენეციის კომისიის დასკვნამდე დაიწყო.

იურიდიულ საკითხთა კომიტეტის თავმჯდომარის ანრი ოხანაშვილმა განაცხადა, რომ ქართული ოცნების "კეთილი ნება" იყო ის, რომ ვენეციის კომისიას მიმართეს. მისივე თქმით, კომისიის დასკვნას ხვალ, 16 აპრილს გამოაქვეყნდება და გამოქვეყნებულ რეკომენდაციებს პლენარული განხილვების დროს გაითვალისწინებენ. ის უარყოფს ბრალდებას, რომ მმართველი გუნდი პროცესის დაჩქარებას ითხოვს.

გაიგეთ მეტი: