2018 წლის ივლისში მსოფლიო სუნთქვაშეკრული ელოდა სამდღიანი სამაშველო ოპერაციის დასრულებას. ტაილანდის გამოქვაბულში ჩარჩენილი 12 ბავშვი და მწვრთნელი გამოქვაბულიდან 17 დღის შემდეგ გამოიყვანეს.

მედიცინის სფეროს წარმომადგენლებმა, რომლების ფეხბურთის გუნდსა და მწვრთნელზე ოპერაციის განმავლობაში ზრუნავდნენ, განაცხადეს, რომ გაბედული და სახიფათო მისიის წარმატებით დასრულებას კეტამინს უმადლიან.

გადარჩენის მისიის დეტალები სამედიცინო ჟურნალში ხუთშაბათს გამოქვეყნდა. მისი მიხედვით, ბიჭებს მყვინთავებმა მღვიმიდან გამოყვანის წინ უცნობი დოზის კეტამინი მისცეს.

ფოტო: The Guardian

როგორც სამაშველო ოპერაციის დასრულებიდან ცოტა ხანში მყვინთავების მეთაურმა CNN-ს უთხრა, მათ გამოიყენეს პრეპარატები, რომლებიც ბავშვებს გამოყვანის პროცესში სიმშვიდეს შეუნარჩუნებდა.

ჟურნალში გამოქვეყნებული საერთო წერილის ავტორები არიან ადგილზე მომუშავე ტაილანდელი ექიმები და ავსტრალიელი ანესთეზიოლოგი. მათი თქმით, ბიჭები გამოყვანისას ნიღბებს ატარებდნენ, რომლებიც მათ სახეს სრულად ფარავდა და ჟანგბადით ამარაგებდა.

პირველ ოთხ ბიჭს, მხოლოდ მზის სათვალეები მისცეს, რათა თვალები მზისგან დაეცვათ. მათ მზის სინათლე 17 დღის განმავლობაში არ ჰქონდათ ნანახი. მათი თავები და კისრები კი გამოყვანისას უძრავად იყო დაფიქსირებული, მღვიმის ვიწრო გვირაბებიდან გამოსვლისას გაუთვალისწინებელი დაზიანების ასარიდებლად. საბოლოოდ კი მათ ჰიპოთერმიის ასარიდებლად პლედებში ახვევდნენ.

თუმცა, წერილის მიხედვით, რიგით მეორე გადარჩენილ ბიჭს გამოქვაბულიდან გამოყვანის შემდეგ სხეულის ტემპერატურა 35°-ზე ჰქონდა დაცემული. მას საავადმყოფოსკენ გზაზე ჰიპოთერმია განუვითარდა და გულის, თირკმლებისა და ნერვული სისტემის დაზიანების საფრთხის ქვეშ დადგა.

ექიმების თქმით, კეტამინი ბიჭების გადასარჩენად კარგი არჩევანი იყო. ის ჰიპოთერმიის რისკს ამცირებს და სხეულის ტემპერატურას აღადგენს.

კეტამინი ლაბორატორიაში პირველად 1962 წელს შექმნეს. აშშ-ს სამხედრო ექიმებმა ის იმ ჯარისკაცებს მისცეს, რომლებიც ვიეტნამში იბრძოდნენ. კეტამინი მათ ტკივილისგან ათავისუფლებდა და პანიკური შეტევებისგან იცავდა. თუმცა, მისი გვერდითი ეფექტია მცირედი ჰალუცინაციები და ექიმებს მისი საშუალებით ადამიანების მკურნალობა შეუზღუდეს. კეტამინის რეპუტაცია ჩამოიშალა და ის ასოცირდება როგორც ქუჩის ნარკოტიკთან, ასევე იმ საშუალებასთან, რომლებსაც მოძალადეები მსხვერპლის დასაძინებლად და გასაუპატიურებლად იყენებენ.

2019 წლის მარტის დასაწყისში, აშშ-ს საკვებისა და მედიკამენტების ადმინსიტრაციამ (FDA) დეპრესიის სამკურნალოდ ახალი მედიკამენტის, ესკეტამინის გამოყენება დაუშვა. აღნიშნული მედიკამენტის გამოყენება მხოლოდ იმ ადამიანებს შეეძლებათ, რომლებმაც მკურნალობის სხვა მეთოდები გამოცადეს, მაგრამ შედეგი ვერ მიიღეს.