იუსტიციის უმაღლესი საბჭოს მოსამართლე წევრი, დიმიტრი გვრიტიშვილი არ გამორიცხავს, რომ მოსამართლეების უვადოდ დანიშვნის შეჩერების შემთხვევაში საბჭოს, წევრები საკონსტიტუციო სასამართლოს მიმართავენ. მისივე თქმით, ისინი მზად არიან საკითხი ყველა დაინტერესებული პირის მონაწილეობით განიხილონ. ამის შესახებ მან თბილისის საქალაქო სასამართლოში საბჭოს გასვლითი სხდომის დაწყებამდე განაცხადა.

"საქართველოს კონსტიტუციაში არ მოიძებნება ნორმა, რომლის საფუძველზეც, ჩვენი მოსაზრებით, შესაძლებელი გახდებოდა მოსამართლეების უვადოდ დანიშვნა. ის ნორმა, რომელსაც ეფუძნებიან საკანონმდებლო ინიციატივის ავტორები, ასევე, ვენეციის კომისიის 2017 წლის 19 ივნისის რეკომენდაცია, რომელიც გამოყენებულია ამ საკანონმდებლო ინიციატივის, დასასაბუთებლად, ჩვენი აზრით, არარელევანტურია", — განმარტა დიმიტრი გვრიტიშვილმა.

საპარლამენტო უმრავლესობის დეპუტატების ნაწილი, მათ შორის ეკა ბესელია და მისი მხარდამჭერები მოსამართლეების უვადოდ დანიშვნის შეჩერების მოთხოვნით საკანონმდებლო ინიციატივა წამოაყენეს. საკანონმდებლო ინიციატივით უნდა შეჩერდეს მოსამართლეების გამწესება უვადოდ, პირველ და მეორე ინსტანციაზე ანუ საქალაქო და სააპელაციო სასამართლოებშ.

"საქართველოს კონსტიტუციის გარდამავალ დებულებებში სპეციალური მუხლია. ამ ჩანაწერით 2024 წლის 31 დეკემბრამდე ანუ 2025 წლამდე შეიძლება იუსტიციის საბჭომ არ გამოიყენოს უვადოდ დანიშვნა და პირველად გამწესების შემთხვევაში მოხდეს 3-წლიანი გამოსაცდელი ვადის გამოყენება", — განაცხადა ეკა ბესელიამ.

აღნიშნულ ინიციატივას ხელს აწერენ დეპუტატები: ეკა ბესელია, გედევან ფოფხაძე, ლევან გოგიჩაიშვილი, დავით ჭიჭინაძე, ოთარ ჩრდილელი, ლევან კობერიძე, კობა ნარჩემაშვილი.